کراچی میں انتظامیہ کی جانب ضلع وسطی میں متعدد شاپنگ مال اور سینکڑوں دکانیں سیل کردی گئیں۔

تفصیلات کے مطابق کورونا ایس او پیز کی خلاف ورزی پر ضلعی انتظامیہ نے کارروائی کرتے ہوئے بیکریز، ریسٹورنٹس اور متعدد شاپنگ مالز کو سیل کردیا ہے۔

ضلعی انتظامیہ کے مطابق شہر قائد کے ضلع وسطی میں 2650 دکانیں، بیکریز اور ریسٹورنٹ سیل کیے گئے جبکہ مینا بازار کریم آباد میں 1350 دکانیں سیل کردی گئیں، الیکٹرانک مارکیٹ میں 63 دکانیں، شاپنگ مال میں 460 دکانیں سیل کی گئیں۔

ذرائع کے مطابق کراچی کے علاقے بہادر آباد میں انتظامیہ نے کورونا ایس او پیز  کی خلاف ورزی پر  شاپنگ سینٹر اور طارق روڈ پر واقع زینب موبائل مارکیٹ کو سیل کردیا جبکہ شاہراہ فیصل پر واقع چوپال ریسٹورنٹ کو بھی سیل کردیا ہے۔

ذرائع کا کہنا ہے کہ ضلعی انتظامیہ نے سخی حسن میں مشہور موبائل مارکیٹ کی چاردکانیں سیل کردیں جبکہ کریم آباد مینا بازار میں بھی کورونا سے متعلق احتیاطی تدابیر اختیار نہ کرنے پر دوسو سے زائد دکانیں عارضی طور پر سیل کردیں۔

ذرائع کا یہ بھی کہنا ہے کہ ضلعی انتظامیہ نے  نارتھ ناظم آباد میں سپرمارکیٹ اور  حیدری مارکیٹ کےقریب شاپنگ مال کی ساڑھے تین سو دکانیں سیل کردیں۔