وزیراعظم عمران خان نے ایک بار پھر اس عزم کا اعادہ کیا ہے کہ کوئی ملک کشمیر کے ساتھ کھڑا ہونا ہو پاکستان اپنے کشمیری بھائیوں کے ساتھ کھڑا ہے۔

وزیراعظم عمران خان کا اسلام آباد ائیرپورٹ پہنچنے کے بعد استقبال کے لیے آنے والے شرکاء سے خطاب میں کہنا تھا کہ سب سے پہلےقوم کا شکریہ ادا کرتاہوں کہ انہوں نے ہمارے لئے دعائیں کیں تاکہ ہم مشکل وقت میں کشمیریوں کا کیس بین الاقوامی سطح پر بھرپور طریقے سے لڑ سکیں۔

عمران خان کا کہنا تھا  کہ خاص طور پر بشریٰ بی بی کا شکریہ ادا کرنا چاہتا ہوں کہ جنہوں نے میرے لیے بہت دعائیں کیں ۔

وزیراعظم عمران خان کا یہ بھی کہنا تھا کہ مقبوضہ وادی میں لوگوں پر ظلم ہورہا ہے اس موقع پر اُن کے ساتھ کھڑے ہونا جہاد ہےاورمیں وعدہ کرتا ہوں کہ مودی کی فاشسٹ اور مسلمانوں سے نفرت کرنے والی حکومت کو بے نقاب کروں گا۔

عمران خان نے کہا کہ بھارتی فوج نے  80 لاکھ کشمیریوں کو کرفیو میں بند کر رکھا ہے، جدوجہد میں اونچ نیچ ہوتی ہے، اچھا وقت بھی آتا ہے اور برا بھی لیکن برے وقت میں مایوس نہیں ہونا کیونکہ کشمیری مائیں، بہنیں اور بزرگ ہماری طرف دیکھ رہے ہیں۔

خطاب میں وزیر اعظم عمران خان نے مزید کہا کہ کوشش انسان کی ہوتی ہےباقی کامیابی اللہ دیتا ہے، کشمیر کے لوگ جدوجہد کرتے رہیں گے اور انشااللہ کشمیری اپنی آزادی حاصل کرکے رہیں گا۔

یاد رہے کہ وزیراعظم عمران خان آج سات روزہ امریکی دورے کے بعد وطن واپس پہنچ گئے ہیں۔

اسلام آباد ایئر پورٹ پر وزیراعظم کے طیارے نے لینڈنگ کی ،عمران خان کے استقبال کے لیے وفاقی کابینہ کے وزراء ، مشیر اطلاعات فردوس عاشق اعوان ، اسد عمر، و دیگر پی ٹی آئی رہنما و کارکنان کی بڑی تعداد بھی موجود ہیں