صدر مملکت ڈاکٹر عارف علوی نے کانفرنس میں خطاب کرتے ہوئے کہا ہے کہ پاکستان چین اقتصادی راہداری دنیا کیلئے ایک مثال ہے۔

تفصیلات کے مطابق اقتصادی تعاون تنظیم کی پارلیمانی اسمبلی کی دوسری جنرل کانفرنس میں صدر مملکت ڈاکٹر عارف علوی نے خطاب کرتے ہوئے کہا ہے کہ پارلیمانی وفود کا خیر مقدم کرتے ہیں، ای سی او  سے میرا تعلق پرانا ہے۔ یہ ممالک خطے میں روابط اور تعاون بڑھانے میں کردار ادا کر سکتے ہیں۔

انہوں نے کہا کہ مسلم امہ کے درمیان اشتراک وقت کی ضرورت ہے، گزشتہ کئی دہائیوں سے مسلم ممالک نے بہت قربانیاں دی ہیں، دنیا کو اس وقت اس لیڈرشپ کی ضرورت ہے جو انسانیت کو اہمیت دے تاکہ اخلاقیات اور انسانیت مسلم معاشرے کی بنیاد بنیں۔

صدر مملکت نے کہا کہ آج ہم کمزور ہیں اس لیے دنیا اور طاقت ور ممالک ہماری بات سنتے تک نہیں ہیں، ہم نے دہشتگردی کا سامنا کیا، فلسطین اور کشمیر کی آزادی کی تحریکوں کو دہشتگردی کا نام دیکر دبا دیا گیا ہے، آج ہم میں عدم برداشت اور انتہا پسندی بڑھ رہی  ہے اور یہ قوموں کی ترقی میں رکاوٹ ہوتی ہیں۔

 صدر مملکت ڈاکٹر عارف علوی نے کہا کہ کورونا وائرس سے پاکستان کامیابی سے نمٹا ہے، ہمارے وزیر اعظم نے لاک ڈاؤن کی بجائے احتیاط کو ترجیح دی۔