امیر جماعت اسلامی سراج الحق نے کہا ہے کہ صوبے اور وفاق ایک دوسرے سے ٹکراﺅ میں ہیں۔

تفصیلات کے مطابق امیر جماعت اسلامی سراج الحق نے اپنے ایک بیان میں کہا کہ شرح نمو میں اضافے کا اگر کسی کو فائدہ ہوا ہو گا تو وہ سرمایہ دار اور جاگیردار طبقہ ہے۔

سراج الحق نے کہا کہ ملک کے 98 فیصد عوام کی حالت میں نہ پہلے کوئی تبدیلی آئی اور نہ ہی پی ٹی آئی کی حکومت میں کوئی تبدیلی آئی ہے۔

 انہوں نے یہ بھی کہا کہ بجلی کی لوڈشیڈنگ دوبارہ شروع ہو گئی ہے۔

امیر جماعت اسلامی کا کہنا تھا کہ پی ٹی آئی اراکین کا پارلیمنٹ میں لوڈشیڈنگ کے مسئلے کو اٹھانا حکومتی کارکردگی پر بڑا سوالیہ نشان ہے۔

 سراج الحق نے کہا کہ حکومت اپنی کارکردگی اخباری رپورٹس سے ہی دیکھ لے ، لفظوں کے ہیر پھیر سے عوام کی حالت نہیں بدلے گی۔

انہوں نے یہ بھی کہا کہ حکومت نے تین سالوں میں بلدیاتی الیکشن کروانے کا نام تک نہیں لیا۔

امیر جماعت اسلامی کا کہنا تھا کہ قانون سازی کے لئے پارلیمنٹ کے بجائے ایوان صدر کا سہارا لیا جاتا ہے۔

انہوں نے یہ بھی کہا کہ کشمیر اور فلسطین سمیت دنیا کے ہر خطے میں مسلمانوں پر ظلم ہو رہا ہے۔

امیر جماعت اسلامی سراج الحق کا مزید کہنا تھا کہ عالمی ادارے اسی طرح خاموش رہے تو مسلمانوں کا ردعمل فطری ہے۔