وزیراعظم عمران خان نے کہا ہے کہ ہمارا فوکس کسان ہے، ملک کا مستقبل ذراعت سے وابستہ ہے۔

تفصیلات کے مطابق وزیراعظم عمران خان کی زیرصدارت پارلیمانی پارٹی کا اجلاس ہوا جس میں تحریک انصاف پارلیمانی پارٹی ارکان کو بجٹ تجاویز پر بریفنگ دی گئی اور وزیرخزانہ شوکت ترین نے بجٹ پر ارکان کو بریفنگ دی اور اعتماد میں لیا۔

 اجلاس میں وزیراعظم عمران خان نے پارلیمانی پارٹی سے گفتگو کرتے ہوئے کہا کہ ہم اقتدار میں آئے تو معیشت کی بدترین حالت تھی، پہلے دو سالوں میں معیشت کی بحالی کی وجہ سے عوام کو ریلیف نہ دے سکے۔

عمران خان نے ارکان پارلیمنٹ سے گفتگو کرتے ہوئے کہا کہ مجھے آپ لوگوں کے مسائل کا بھی احساس ہے، عوامی ردعمل کا سب سے زیادہ سامنا آپ لوگوں کو رہا۔

وزیراعظم نے کہا کہ معیشت بحال ہو چکی، اب ہم ترقی کی طرف جارہے ہیں، اس بجٹ کے بعد ملک بھر میں ترقیاتی کاموں کی رفتار تیز ہو جائے گی۔

عمران خان نے یہ بھی کہا کہ ہم نے بجٹ میں کمزور طبقے کو ریلیف دینے پر فوکس کیا ہے،12 ایکڑ زمین رکھنے والے کسانوں کو بلاسود قرضے دیں گے۔

وزیراعظم کا کہنا تھا کہ بینک قرضے دینے سے ڈرتے ہیں، اخوت جیسی تنظیموں کے ذریعے قرضے دے رہے ہیں۔

عمران خان کا یہ بھی کہنا تھا کہ ماضی میں ہمیشہ اوپر والے طبقے کا سوچ کر بجٹ بنائے گئے، ہمارا فوکس نچلے طبقے پر ہے، کمزور طبقہ خوشحال ہوگا تو ملک اٹھے گا۔ تنخواہ دار طبقے کو بھی ریلیف فراہم کریں گے۔

وزیراعظم عمران خان کا مزید کہنا تھا کہ بجلی اور فوڈ سبسڈی میں اضافہ کررہے ہیں، ہم براہ راست سبسڈی دیں گے تاکہ عام آدمی کو فائدہ پہنچے۔