پاکستانی ماڈل، گلوکارہ، اداکارہ و میزبان متھیرا نے  شوبز انڈسٹری کی اداکارہ ایمان علی کو آڑے ہاتھوں لے لیا۔

اداکارہ و میزبان متھیرا نے حالیہ بیان پر ردّعمل دیتے ہوئے کہا ہے کہ اداکارہ ایمان علی کو ذہنی طور پر مدد کی ضرورت ہے۔

متھیرا نے فوٹو اینڈ ویڈیو شیئرنگ ایپ انسٹاگرام پر اداکارہ ایمان علی کے لیے خصوصی پیغام جاری کیا ہے۔

متھیرا نے اپنی انسٹاگرام اسٹوری میں کہا کہ مجھے نہیں معلوم کہ’خُسرہ‘ یا ’ماسی‘ جیسے الفاظ کسی کی توہین کرنے کے لیے کیوں استعمال ہوتے ہیں۔

اداکارہ متھیرا نے کہا کہ ایمان علی ایک بہت ہی خوبصورت خاتون ہے اور اسے ذہنی طور پر مدد کی ضرورت ہے لیکن براہِ کرم! اس طرح کے الفاظ استعمال نہ کریں جس سے کسی کی توہین ہو۔

دوسری جانب متھیرا نے ایمان علی کا ساتھ دیتے ہوئے کہا کہ ہمارے معاشرے میں دماغی صحت ایک بہت بڑی تشویش ہے اور وہ لوگ جو کمنٹ سیکشن میں ایمان پر تنقید کررہے ہیں، یہ وہی لوگ ہیں جو دوسروں کی توہین کے لیے ایسے الفاظ استعمال کرتے ہیں۔

اداکارہ نے اپیل کی کہ براہ کرم! اس بیان کو مزید اُجاگر کرنا بند کریں، ایسا کرنے سے ایمان جیسے تنقید کا شکار لوگ مزید ذہنی اذیت میں مبتلا ہوجاتے ہیں۔

واضح رہے کہ حال ہی میں ایمان علی ایک نجی ٹی وی چینل کے پروگرام میں شریک ہوئی تھیں جہاں اُنہوں نے انکشاف کیا تھا کہ اُنہیں اپنا چہرہ بالکل پسند نہیں ہے، ساتھ ہی انہوں نے اپنے چہرے کو خواجہ سرا سے تشبیہ دی تھی۔

ایمان علی کے اس بیان پر خواجہ سراؤں کی جانب سے اداکارہ کو خواب کرارے جواب دیے گئے۔