مقبوضہ کشمیر کی سابق وزیراعلیٰ محبوبہ مفتی کی صاحبزادی التجا مفتی کا کہنا ہے کہ عمران خان کا اقوام متحدہ میں خطاب سن کر کشمیر یو ں کو اچھا لگا کہ کوئی تو ہمارے لیے بات کررہاہے۔

تفصیلات کے مطا بق محبوبہ مفتی کی صاحبزادی التجا مفتی نے برطانوی نشریاتی ادارے بی بی سی کو ایک انٹرویو دیتے ہوئےکہا کہ پاکستانی وزیراعظم عمران خان نے اقوام متحدہ میں بات کی تو کشمیریوں کو اچھا لگا اور نتیجتاً ان کی تقریر کے بعد وہ سڑکوں پہ آگئے، آج کشمیر میں ہر کوئی یہ سوچ رہا ہے کہ کیا بٹوارے کے بعد بھارت سے جا ملنے کا فیصلہ درست تھا یا نہیں؟

التجا مفتی نے کہا ہے کہ آج کشمیری سوچ رہے ہیں کہ جس ملک کے ساتھ ہم تقسیم کے وقت منسلک  ہوئے تھے وہ تو  آج سکیولر نہیں رہا ہے تو کیا ہماری اس وقت کی قیادت نے صحیح فیصلہ کیا تھا؟ انہوں نے دعویٰ کیا کہ اس وقت کشمیر کے نوجوانوں میں بہت زیادہ بھارت مخالف جذبات پیدا ہو گئے ہیں۔

انھوں نے کہا کہ بھارت گاندھی کابھارت نہیں رہا، کشمیریوں کااتنا حق نہیں کہ اتنا بڑا فیصلہ لینے سے پہلےان سے پوچھ لیاجائے، بھارت کشمیریوں کی طاقت کو چھیننا چاہتےہیں، کشمیرمیں بھارتی اقدام کا ترقی اور منصوبہ بندی سے کوئی تعلق نہیں،یہ لوگ کشمیریوں کو مزہ چکھاناچاہتےہیں۔

التجا نے مزید بتا یا کہ بھارت نہیں چاہتا کشمیرسے آوازاٹھے، انٹرنیٹ کی سہولت کھلنے سے لوگ بتائیں گے کہ کیسے انہیں اتنا عرصہ قید میں رکھاگیا، چھوٹے بچوں پر تشدکیاگیاہے، کشمیر کے لوگوں کو پنجرے میں بندکرکے رکھ دیاہے یہ لوگ چاہتے ہیں کہ جمہوری اور سیکیولرملک میں ہندوؤں کا راج ہوجائے۔

انہوں نے سوال کیا کہ ترقی کا کہنے والے بتائیں کہ انہیں اب تک کس نے روکا تھا؟ ان کا کہنا تھا کہ ریاست بہار سے لوگ یہاں مزدوری کے لیے آتے ہیں کیونکہ یہاں انھیں بہتر اجرت ملتی ہے۔

سانحہ کشمیر کا ذکر کرتے ہوئے سابق وزیراعلیٰ کی صاحبزادی التجا مفتی نے مصرعہ پڑھا کہ’’ لمحوں نے خطا کی صدیوں نے سزا پائی‘‘۔