وزیراعلیٰ پنجاب سردار عثمان بزدار نے کہا کہ کسان پر کوئی بوجھ نہیں ڈالا جائے گا۔

تفصیلات کے مطابق وزیراعلیٰ پنجاب سردار عثمان بزدارکی زیرصدارت صوبائی کابینہ کا اجلاس ہوا جس میں انہوں نے کہا کہ آج پی ٹی آئی کے دور میں کاشت کار خوشحال ہے۔

اجلاس میں صوبائی وزراء، مشیران، معاونین خصوصی، چیف سیکرٹری اور متعلقہ محکموں کے سیکرٹریز نے شرکت کی۔

انہوں نے کہا کہ کاشتکاروں کو مزید خوشحال بنائیں گے اور ان کو ریلیف دیں گے ۔

کابینہ اجلاس میں صوبہ پنجاب کے نئے مالی سال 2021-22 کی بجٹ تجاویز اتفاق رائے سے منظور کی گئی۔

اجلاس میں مالیاتی بل 2021 کی بھی منظوری دی گئی۔

پنجاب کابینہ نے صوبائی ملازمین کی تنحواہوں اور پنشن میں 10 فیصد اضافے کی منظوری دے دی۔

کابینہ اجلاس میں  بورڈ آف ریونیو کی جانب سے زرعی ٹیکس میں اضافے کی تجویز پیش کی گئی۔

وزیراعلیٰ پنجاب عثمان بزدار نے زرعی ٹیکس میں اضافے کی تجویز کو رد کر دیا۔

پنجاب کابینہ نے ورکرز کی کم از کم اجرت میں اضافے کی منظوری دے دی ، ورکرز کی کم از کم اجرت 17500 سے بڑھا کر 20 ہزار روپے کرنے کا احسن فیصلہ کر دیا۔

وزیراعلیٰ پنجاب عثمان بزدارنے بہترین بجٹ پر صوبائی وزیر خزانہ ہاشم جواں بخت، مشیر ڈاکٹر سلمان شاہ، چیف سیکرٹری، چیئرمین منصوبہ بندی و ترقیات، سیکرٹری خزانہ اور متعلقہ محکموں کے افسران کی کارکردگی کی تعریف کی۔

عثمان بزدار نے کہا کہ پنجاب کی تاریخ میں پہلی بار ترقیاتی بجٹ میں ریکارڈ اضافہ کیا جارہا ہے ، پہلی بار ہر ضلع کا علیحدہ ڈویلپمنٹ پیکیج تیار کیا گیا ہے اور بجٹ میں عام آدمی کو ریلیف دینے کے لئے اقدامات تجویز کئے گئے ہیں۔

وزیراعلیٰ پنجاب عثمان بزدار نے کہا کہ صوبے کی عوام کی بنیادی ضروریات کو مدنظر رکھ کر ترجیحات کا تعین کیا گیا ہے ، یہ بجٹ اعدادوشمار کی جادوگری نہیں بلکہ متوازن ترقی پر مبنی حقیقی دستاویزہے۔

انہوں نے کہا کہ نااہل اورناکام اپوزیشن کا کام صرف شور مچانا رہ گیا ہے ، حکومت کے اچھے کاموں پر تنقید برائے تنقید کرنا انہیں زیب نہیں دیتا ، اپوزیشن نے کورونا وباء کے دوران بھی صرف واویلا کیااورعوام کو تنہا چھوڑے رکھا۔

وزیراعلیٰ پنجاب نے کہا کہ بجٹ اجلاس کے دوران اراکین اسمبلی سے مسلسل رابطہ رہے گا۔

اجلاس میں کابینہ سٹینڈنگ کمیٹی برائے فنانس اینڈ ڈویلپمنٹ کے57 ویں اور58 ویں اجلاسوں کے فیصلوں کی توثیق کی گئی۔

اجلاس میں کابینہ سٹینڈنگ کمیٹی برائے قانونی امور کے60 ویں،61 ویں اور62 ویں اجلاسوں کے فیصلوں کی توثیق کی گئی۔

سیکرٹری خزانہ کی صوبائی بجٹ اور چیرمین پی اینڈ ڈی کی سالانہ ترقیاتی پروگرام کے اہم خد و خال کے حوالے سے کابینہ کو بریفنگ دی گئی۔