مریم اورنگزیب کا کہنا ہے کہ عمران خان کی کل کارکردگی جھوٹ، بدزبانی، بد کلامی، بد اخلاقی ہے۔

تفصیلات کے مطابق پاکستان مسلم لیگ (ن) کی ترجمان مریم اورنگزیب نے اپنے جاری کردہ بیان میں کہا ہے کہ عمران صاحب  3 سال میڈیا، سیاسی مخالفین کو جیل میں ڈالنے پر آپ کی توجہ نہ ہوتی تو آج نواز شریف کی تختیاں اکھاڑنے کی ضرورت نہ پڑتی، عمران صاحب کی کارکردگی نواز شریف اور شہباز شریف کے منصوبے پر نئی تختیاں لگانا اورپرانی اکھاڑنا ہے۔

انھوں نے کہا ہے کہ عمران صاحب کی کارکردگی نوازشریف کڈنی ہسپتال کا نام بدلنا ہے،سوات میں گردوں کے علاج کا ہسپتال سرکاری وسائل سے تعمیر نہیں ہوا تھا اس ہسپتال کی تعمیر نجی عطیات کے ذریعے ہوئی تھی، کاروباری افراد، مخیرحضرات، شخصیات، شہریوں، سرکاری ملازمین نے انفرادی حیثیت میں فنڈز دئیے تھے۔

مسلم ملیگ ن کی ترجمان نے کہا ہے کہ بدترین سیلاب کے بعد 2010 میں یہ ہسپتال تعمیر کرنے کا فیصلہ ہوا تھا، یہ ایک ٹرسٹ ہسپتال ہے، ہسپتال کی تعمیر میں کوششوں پر نوازشریف کے نام پر اس ہسپتال کا نام رکھا گیا تھا، افسوس چھوٹی گھٹیا ذہنیت عوام کی خدمت میں ناکامی پر کم ظرف حرکتیں کرتی ہے۔

 مریم اورنگزیب نے کہا ہے کہ الزامات کا بیانیہ عدالتوں میں تباہ ہو گیا ہے یہ بے بسی کی وجہ ہے کہ سیاسی مخالفین کو گالیاں دو اور بدزبانی کرو، عمران صاحب کے ’پلے نئیں دھیلہ‘ اس لئے نواز شریف اور شہباز شریف کے نام کی تختیاں بدلو۔

انھوں نے سوال پوچھتے ہوئے کہا ہے کہ عمران صاحب ایٹمی پروگرام سے نواز شریف کا نام کیسے مٹاو گے؟، عمران صاحب ملک بھر میں موٹر ویز بجلی ، گیس اور ایل این جی کے منصوبوں سے کیسے تختیاں اتاروگے ؟، عمران صاحب سی پیک پر نوازشریف کالکھا نام کیسے ہٹاو گے ؟، عمران صاحب عوام کے لئے سستی چینی ، گیس، لوڈ شیڈنگ سے نجات پر سے نواز شریف کا نام کیسے مٹاو گے؟ عمران صاحب شوکت خانم ہسپتال کا افتتاح بھی نوازشریف نے کیا تھا، کیا اس کا نام بھی بدلو گے؟گر ا کر پھر بناو گے؟

مریم اورنگزیب نے مزید کہا ہے کہ عمران صاحب منصوبوں پر تختیاں اہم نہیں ہوتیں بلکہ خدمت کا جذبہ انسان کے عمل اور نیت میں جھلکتا ہے، نوازشریف اور شہبازشریف نے دن رات پاکستان کے عوام کی خدمت کی ہے، بائیس کروڑ عوام کے دل میں نوازشریف اور شہبازشریف کی خدمت کی تختیاں لگی ہوئی ہیں۔