مشیر برائے وزیرِاعلیٰ پنجاب آصف محمود نے کہا ہے کہ وزیراعظم عمران خان کے ویژن کے تحت سیاحتی شعبے پر کام کررہے ہیں۔

تفصیلات کے مطابق پنجاب مشیر برائے وزیرِاعلیٰ پنجاب آصف محمود کی زیرِ صدارت تلاجہ  فورٹ پر آثارِ قدیمہ رپورٹ کا جائزہ لینے کے لئے اجلاس ہوا جس میں آثار قدیمہ ڈیپارٹمنٹ پنجاب یونیورسٹی کی ٹیم نے وزیر اعلیٰ پنجاب کو بریفنگ دی۔

 پنجاب یونیورسٹی ٹیم نے جدید ٹیکنالوجی کی مدد سے سائٹ کا معائنہ کیا اور قلعہ کے رہائشی علاقے، واٹر ٹینک اور مسجد سمیت دیگر شواہد اکھٹے کیئے جن پربعد میں تحقیق کی جائے گی۔

اجلاس میں سروے ٹیم نے کہا کہ مختلف مراحل میں تحقیقاتی کام کرنے کی ضرورت ہے،جبکہ سائٹ کی تاریخی اہمیت کا اندازہ کرنے کے لئے مزید تحقیق کریں گے۔

مشیر وزیرِ اعلیٰ پنجاب آصف محمود کا کہنا تھا وزیراعظم عمران خان کے ویژن کے تحت سیاحتی شعبے پر کام کررہے ہیں تلاجہ فورٹ پر سیاحتی دلچسپی کے لئے اقدامات کریں گے ۔

آصف محمود نے کہا کہ وادی سون میں سیاحت کا بے پناہ پوٹینشل ہے،محکمہ سیاحت تلاجہ قلعہ کے تحفظ و بحالی  کے لئے ہرممکن اقدامات کرے گا۔

ان کا کہنا تھا کہ پنجاب میں سیاحتی مقامات کے لئے خصوصی پروگرام مرتب دے رہے ہیں، سیاحوں کے لئے معلوماتی سینٹر اور سائن بورڈ نصب کئے جائیں گے۔

مشیر وزیرِ اعلی پنجاب آصف محمود کا مزید کہنا تھا کہ سائٹ پر سیاحتی علاقے میں روزگار کے مواقع بھی فراہم کریں گے۔