شوبزسے وابستہ شخصیات نے لاہور کے مینارِ پاکستان پر ٹک ٹاکر خاتون عائشہ اکرم کو ہراساں کرنے کے واقعے پر اپنے ردعمل میں انتہائی غم و غصے کا اظہار کیا ہے۔

اداکارہ عائزہ خان کا کہنا ہے کہ اب تک کورونا وائرس کی وجہ سے کہتے ہیں کہ گھرمیں محفوظ رہیں، مگر شرم آتی ہے یہ کہتے ہوئے کہ گھر میں رہیں، اب باہر عزت کو خطرہ ہے۔

اداکار فرحان سعید کا کہنا ہے کہ شرم آ رہی ہے کہ میں اس معاشرے کا حصہ ہوں، جس طرح مردوں نے خوفناک حرکت کی، یہ قابلِ شرم ہے۔

اداکارہ انوشے نے واقعے پر اپنے ردِ عمل کا اظہار کرتے ہوئے کہا ہے کہ دیکھ کر افسوس ہوتا ہے کہ مردوں نے ایک لڑکی کو ہراساں کیا۔

سینئر اداکار نعمان اعجاز نے کہا ہے کہ جب سے اس واقعے کے بارے میں سنا ہے شرمندگی ہو رہی ہے، کیا ایسے ہوتے ہیں پاکستانی؟

اداکار کا یہ بھی کہنا ہے کہ یہ 400 کا لشکر تھا، ان کو عبرت ناک سزا دینی چاہیئے، ڈوب کر مر جائیں جنہوں نے ایسا کیا، شرم آنی چاہیئے۔

اداکارہ مریم نفیس نے کہا ہے کہ عائشہ اکرم اکیلی نہیں تھی، دن کا وقت تھا اور وہ پورے لباس میں تھی۔

واضح رہے کہ لاہور کے گریٹر اقبال پارک میں یومِ آزادی کے موقع پر خاتون ٹک ٹاکر سے دست درازی کا خوفناک واقعہ 3 روز بعد سوشل میڈیا کے ذریعے سامنے آیا۔

اوباش نوجوانوں نے ٹک ٹاکر عائشہ اکرم اور اس کے ساتھیوں کو تشدد کا نشانہ بنایا اور کپڑے پھاڑ دیئے جبکہ پولیس واقعہ سے بے خبر رہی۔

بعدازاں ایک نوجوان نے مشکل سے خاتون سے ہجوم سے نکالا تھا۔

خاتون کی درخواست پر 400 نامعلوم ملزمان کے خلاف مقدمہ درج کرلیا گیا ہے تاہم ابھی کوئی سزا نہیں سنائی گئی۔

واقعے کی ویڈیو وائرل ہونے پر وزیراعلیٰ عثمان بزدار ایکشن نے فوری کارروائی کا حکم دیتے ہوئے ویڈیو کے مدد سے ملزمان کو گرفتار کرنے کا حکم دیدیا ہے۔

وزیراعلیٰ عثمان بزدار کا کہنا تھا کہ خاتون کو انصاف دلانا حکومت کی ذمہ داری ہے۔

یاد رہے کہ پولیس کی جانب سے کارروائی کرتے ہوئے تھانہ لاری اڈا میں مقدمہ درج کیا گیا۔

درج مقدمے کے متن کے مطابق خاتون یوٹیوبر ہے جبکہ حملہ آور ہجوم میں 400 سے 500 افراد شامل تھے۔

وزیر اعظم عمران خان نے واقعے کا نوٹس لیتے ہوئے خاتون سے دست درازی کرنے والوں کو فوری گرفتار کرنے کا حکم دیا تھا

وزیر اعظم نے آئی جی پنجاب سے رابطہ کر کے ہدایت دی ہے کہ خاتون سے دست درازی کرنے والوں کو فوری گرفتار کیا جائے۔

گزشتہ رات گئے لاہور پولیس نے راوی روڈ، بادامی باغ، لاری اڈا اور شفیق آباد کے علاقوں میں چھاپہ مار کارروائیاں بھی کی ہیں اور 15 افراد کو حراست میں لے کر تھانہ لاری اڈا منتقل کردیا۔

پولیس کا کہنا ہے زیر حراست افراد کے موبائل نمبرز کی 14 اگست کو لوکیشن ٹریس کی جائے گی اور زیر حراست افراد کو ویڈیوز میں نظر آنے والے ملزمان سے میچ کیا جائے گا۔

بعد ازاں پولیس نے مزید 20 کے قریب مشتبہ افراد سے پوچھ گچھ کی، تاہم پوچھ گچھ کے بعد انہیں چھوڑ دیا گیا۔ پولیس کے مطابق مشتبہ افراد کی ویڈیو سے شناخت کرنے کی کوشش کی گئی۔