وزیراعلیٰ بلوچستان جام کمال خان نے کہا ہے کہ تھیلیسیمیا ایک موروثی بیماری ہے اس پر قابو پانے کیلئے احتیاطی تدابیر انتہائی ضروری ہیں۔

تفصیلات کے مطابق وزیراعلیٰ بلوچستان جام کمال خان نے گورنر سندھ عمران اسماعیل سے ملاقات کی جس میں دونوں رہنماؤں کے درمیان تھیلیسیمیا مرض کی روک تھام، اس حوالے سے قانون سازی اور بین الصوبائی ہم آہنگی کے فروغ سمیت مذہبی سیاحت اور باہمی دلچسپی کے دیگر امور پر تبادلہ خیال ہوا۔

ملاقات میں اراکین سندھ اسمبلی سنجے گنگوانی، رابعہ اظفر نظامی، چیف سیکرٹری بلوچستان مطہر نیاز رانا، وزیراعلیٰ کے پرنسپل سیکرٹری زاہد سلیم، سیکرٹری اسپیشلائزڈ ہیلھ کئیر اینڈ میڈیکل ایجوکیشن نورالحق بلوچ اور سیکرٹری پرائمری ہیلتھ کیئرعزیزاحمد جمالی بھی موجود تھے۔

ملاقات کے دوران رکن صوبائی اسمبلی سندھ رابعہ اظفر نظامی نے تھلیسیمیا کے مرض کے تدارک، شادی سے قبل تھیلییمیا اسکریننگ ٹیسٹ لازمی قرار دینے کے لیے اٹھائے گئے اقدامات،اس حوالے سے کی گئی قانون سازی پر تفصیلی بریفنگ دی۔

گورنرسندھ عمران اسمائیل نے کہا کہ بلوچستان آکر ہمیشہ خوشی محسوس ہوتی ہے، بلوچستان میں تھیلسیمیا کے تدارک کے لئے ہرممکن کوشش کریں گے۔

وزیراعلیٰ بلوچستان جام کمال خان کا کہنا تھا کہ صحت کے شعبے میں ترقی کیلئے جامع حکمت عملی کے تحت اقدامات کر رہے ہیں، دور افتادہ علاقوں میں ٹیلی میڈیسن پراجیکٹ کا آغاز کیا ہے۔

ملاقات میں ہنگلاج ماتا مندر پر سیاحت کے فروغ پر بھی تبادلہ خیال ہوا جس میں وزیراعلیٰ بلوچستان جام کمال خان نے کہا کہ مذہبی سیاحت کے فروغ کے لئے ہنگلاج ماتا مندر کی ماسٹر پلاننگ کی جا رہی ہے۔

وزیراعلیٰ بلوچستان نے گورنر سندھ کو بلوچستان میں جاری ترقیاتی عمل کے حوالے سے بھی آگاہ کیا۔

ملاقات میں تھیلیسیمیا مرض کے حوالے سے بھر پور آگاہی مہم چلانے اور خون عطیہ کرنے کی ضرورت پر زور دیا گیا۔