وزیراعظم عمران خان کا کہنا ہے کہ کرتارپور منصوبے کا تعمیراتی کام حتمی مراحل میں داخل ہو گیا ہے اور اسے 9 نومبر کو عوام الناس کیلئے کھول دیا جائے گا۔
تفصیلات کے مطابق منصوبے سے متعلق سوشل میڈیا پر پیغام میں وزیر اعظم عمران خان کا کہنا ہے کہ پاکستان پوری دنیا کی سکھ برادری کیلئے اپنے دروازے کھولنے جا رہا ہے،بھارت سمیت دنیا بھر کی سکھ برادری سب سے بڑے گوردوارے کی زیارت کر سکیں گے۔

عمران خان نے کہا کہ منصوبہ مقامی معیشت کیلئے کلیدی، ملک کیلئے زرمبادلہ کا ذریعہ ہو گاجبکہ کرتارپور، سکھ برادری کیلئے سب سے بڑا مذہبی مرکز ثابت ہو گا۔

وزیر اعظم نے کہا کہ سیاحت اور میزبانی سمیت کئی شعبوں میں روزگار کے مواقع پیدا ہوں گے، پاکستان میں مذہبی مقامات کیلئے سیاحت عروج پر ہے۔

واضح رہے کہ حکومت کا سکھ کمیونٹی سے وعدہ پورا ہونے کے قریب ہیں، کرتار پور راہداری منصوبہ آخری مراحل میں داخل ہوچکا ہے جبکہ تمام عمارتیں مکمل ہو گئیں ، کرتار پور کیمپلکس کو بجلی فراہم کر دی گئی، بابا گرونانک کے پانچ سو پچاس ویں جنم دن کی تقریبات میں شرکت کے لیے سکھوں کی رجسٹریشن بھی شروع ہو گئی ہے۔

پاکستان نے راہداری کھولنے کے لیے 95 فیصد سے زائد کام مکمل کر لیا ہےجبکہ کرتار پور راہداری کا افتتاح 11 نومبرکو پروقارتقریب میں کیا جائے گا، مذکورہ تقریب سکھ برادری کے بانی بابا گرو نانک کی سالگرہ سے متعلق ہوگی۔