پاکستان شوبز انڈسٹری کی مقبول ترین ماڈل اور اداکارہ نادیہ حسین نے گلوکار و پی ٹی آئی رہنما ابرار الحق کے آج کل کی ماؤں پر دیے گئے حالیہ بیان پر سخت الفاظ میں ردّعمل دیا ہے۔

اداکارہ نے ابرار الحق کے بیان پر تبصرہ کرتے ہوئے طنزیہ انداز میں کہا کہ آپ نے ماں کی گود سے کلمہ سُنتے سُنتے نچ پنجابن اور بِلّو کے گھر تک کا سفر پتا نہیں کیسے طے کیا۔

ماڈل کے تبصرے پر ایک صارف نے جواب دیتے ہوئے کہا کہ اُنہوں نے نعتیں بھی پڑھیں لیکن آپ کو صرف یہی یاد ہے۔

نادیہ حسین نے کہا کہ مجھے سب یاد ہے لیکن ابرارالحق کو کسی نے یہ حق نہیں دیا کہ وہ آج کل کی ماؤں کی تربیت پر تنقید کریں۔

اُنہوں نے سوالیہ انداز میں کہا کہ ابرار نے نعتوں کے علاوہ گانے جو گائے، اُس سے نوجوان نسل نے بہت کچھ سیکھا؟

واضح رہے کہ حال ہی میں اسلام آباد میں تقریب سے خطاب کرتے ہوئے ابرارالحق نے کہا تھا کہ جب ہم چھوٹے تھے تو اُس وقت کی مائیں بچوں کو گود میں لیکر اُنہیں کلمہ سُنا کر اور اللّہ تعالیٰ کا نام سُنا کر سُلایا کرتی تھیں اور بچے فوراً سے سو بھی جاتے تھے۔

ابرارالحق نے موجودہ دور کی ماؤں پر تبصرہ کرتے ہوئے کہا تھا کہ آج کل کی مائیں اپنے بچوں کو گود میں لیتی ہیں اُنہیں موبائل فونز تھما دیتی ہیں جن پر دُعاؤں کے بجائے بے بی شارک چل رہا ہوتا ہے۔

 سوشل میڈیا صارفین کی جانب سے اُن کے بیان پر اتفاق کیا گیا تھا۔