فردوس عا شق اعوان کا کہنا ہے کہ وزیراعظم عمران خان نے سابق وزیر اعظم محمد نواز شریف کی صحت کے متعلق پنجاب حکومت سے تفصیلات طلب کی ہیں۔

تفصیلات کے مطابق معاون خصوصی برائےاطلاعات فردوس عاشق اعوان نے سماجی رابطے کی ویب سائٹ ٹوئٹر پراپنے پیغام میں کہا ہے کہ وزیر اعظم نے متعلقہ حکام کو ہدایت دی ہے کہ ان کے خاندان کے افراد کی منشاء کے مطابق انھیں علاج معالجے کی بہترین سہولیات فراہم کی جائیں۔

وزیراعظم عمران خان نے محمد نواز شریف کی صحت کے متعلق پنجاب حکومت سے تفصیلات طلب کی ہیں۔متعلقہ حکام کو ہدایت دی ہیں کہ ان کے خاندان کے افراد کی منشاء کے مطابق انھیں علاج معالجے کی بہترین سہولیات فراہم کی جائیں۔وزیراعظم کی ان کی صحت یابی کیلئے دعا اور نیک تمناؤں کا اظہار۔

Advertisement

— Dr. Firdous Ashiq Awan (@Dr_FirdousPTI) October 23, 2019

فردوس عا شق نے مزید کہا کہ وزیراعظم نے نواز شریف کی صحت یابی کیلئے دعا اور نیک تمناؤں کا بھی اظہارکیا۔

واضح رہے کہ سابق وزیراعظم میاں نواز شریف کی صحت بہتر ہونا شروع ہوگئی ہے،اب ان کے پلیٹ لیٹس کی تعداد 29 ہزار تک پہنچ گئی ہے۔

پاکستان مسلم لیگ ن کے قائد نواز شریف کو دو میگا کٹ لگانے کے بعد ان کا دوبارہ سی بی سی ٹیسٹ کیا گیا ،جس کی تازہ ترین رپورٹ کے مطابق پلیٹ لیٹس کی تعداد 29 ہزار تک پہنچ گئی ہے۔

ذرائع کے مطابق نواز شریف کی صحت تسلی بخش ہے تاحال ایسی بھی کوئی اطلاع نہیں ہے کہ میاں نواز شریف کے جسم کے کسی بھی حصے سے کسی قسم کی بلیڈنگ ہوئی ہو۔

سابق وزیراعظم کو طبیعت کی سخت خرابی کے بعد پیر کی رات نیب لاہور کے دفتر سے سروسز اسپتال لاہور منتقل کیا گیا تھا۔

نواز شریف کے ذاتی معالج ڈاکٹر عدنان کا کہنا تھا کہ شب کو خون کے نمونوں میں پلیٹ لیٹس کی تعداد 16 ہزار رہ گئی تھی جو اسپتال منتقلی تک مزید کم ہوکر 12 ہزار ہوگئی جبکہ صبح معلوم ہوا تھا کہ ان کی تعداد صرف دو ہزار رہ گئی تھی۔

ذرائع کے مطابق سروسز اسپتال لاہور کے پرنسپل پروفیسر ایاز محمود کی سربراہی میں چھ رکنی میڈیکل بورڈ نواز شریف کا علاج کررہا ہے، جس میں ڈاکٹر کامران خالد، ڈاکٹر عارف ندیم ، ڈاکٹر فائزہ بشیر، ڈاکٹر خدیجہ عرفان اور ڈاکٹر ثوبیہ قاضی شامل ہیں۔