امریکی جریدے نے سب اچھا ہے کہ راگ الاپنے والے انتہا پسند بھارتی وزیر اعظم  نریندر مودی کو  ہی ہندوستان کی معیشت  کے لئے بڑا خطرہ قرار دے دیا ہے۔

تفصیلات کے مطابق امریکی جریدے نے اپنی حالیہ رپورٹ میں بھارت کی معیشت کے حوالے سے ایک جائزہ پیش کیا ہے۔

امریکی جریدے دی اکانومسٹ نے اپنی رپورٹ میں کہا  ہے کہ بھارت کی معیشت بدحالی کا شکار ہے، ایسی صورتحال کے باوجود مغرب کا اکثر تجارتی طبقہ مودی کی حمایت کررہا ہے۔جریدے کے مطابق بھارت میں ٹیکس دینے والوں کی شرح بھی خطرناک حد تک کم ہوئی ہے جبکہ کاروں اور موٹرسائیکلوں کی خرید میں بھی 20 فیصد تک کمی ہوئی ہے۔

رپورٹ میں لکھا ہے  کیہ بھارت میں کئی بینک اور دیگر قرض دینے والے ادارے بحران کا شکار ہیں جس کی وجہ سے 2 سو ارب ڈالر کے مقروض ہوچکے ہیں۔امریکی جریدے نے یہ بھی لکھا کہ بھارت کی معیشت نااہل اور برے طریقے سے چلائی جارہی ہے، اس کے علاوہ مقبوضہ جموں کشمیر اور آسام میں مسلمانوں سے انتہائی امتیازی سلوک برتا جارہا ہے۔

رپورٹ نے لکھا کہ مقبوضہ وادی اور آسام میں مقیم مسلمانوں کے ساتھ امتیازی سلوک اور مظالم نے دنیا کے سامنے بھارت کا مکروہ چہرہ بےنقاب کردیا ہے۔ جس کی وجہ بھارت میں عالمی سرمایہ کاری بری طرح سے متاثرہوئی ہے۔

رپورٹ کے مطابق  گذشتہ برس کے مقابلے  میں ملکی نشو نما  8 فیصد سے کم ہو کر 5 فیصد ہوگئی۔عالمی جریدے نے بھارت کو خبردار کردیا ہے کہ اگر بڑھتے ہوئے بحران کو جلد قابو نا کیا گیا تو بھارت جلد معاشی قحط میں مبتلا ہوجائے گا۔