وزیر اعظم عمران خان نے وفاقی کابینہ کا اجلاس طلب کر لیا ہے۔

تفصیلات کے مطابق عمران خان نے وفاقی کابینہ کا اجلاس ملکی، سیاسی اور معاشی صورتحال کا جائزہ لینے کے لیے 21 ستمبر کو طلب کرنے کا فیصلہ کیا ہے۔

ذرائع کا کہنا ہے کہ کابینہ اجلاس میں نیوزی لینڈ کے دورہ منسوخی سمیت اہم امور پر گفتگو ہو گی۔

ذرائع کا کہنا ہے کہ کابینہ اجلاس میں ای وی ایم مشین اور اوورسیز پاکستانیوں کو ووٹ کا حق دینے پر بریفنگ ہو گی۔

ذرائع کے مطابق وفاقی کابینہ اس اجلاس میں 20 نکاتی ایجنڈے پر غور کرے گی۔

ایجنڈے کے مطابق اجلاس میں وزارت مواصلات کے رولز آف بزنس 1973 میں ترمیم ہو گی۔

نادرا کے فائنینشل سال 2021 کے آڈٹ کی منظوری، ڈریپ کے سی ای او کی تعیناتی کی منظوری، مردم شماری کے لیے تجاویز کی منظوری، کابینہ ازبکستان کو بزنس ویزا لسٹ میں شامل کرنے کی منظوری اور جموں کشمیر سٹیٹ پراپرٹی بجٹ کی منظوری ایجنڈہ میں شامل ہے۔

ذرائع کا کہنا ہے کہ خطے کے ممالک سے فلمیں درآمد کرنے کا معاملہ، متبادل تنازعاتی قرارداد کا سینٹر اسلام آباد میں کھولنے کا معاملہ اور کابینہ میں ریلوے بورڈ کے ممبران کی تعیناتی کا معاملہ کابینہ میں زیر بحث آئے گا۔

ذرائع کا مزید کہنا ہے کہ کابینہ کمیٹی برائے نجکاری اور ای سی سی کے فیصلوں کی توثیق بھی ایجنڈے میں شامل ہے۔