وزیر اعظم عمران خان سے پاکستان کرکٹ ٹیم کی ملاقات  متوقع ہے۔

تفصیلات کے مطابق اس حوالے سے امکان ظاہر کیا جا رہا ہے کہ یہ ملاقات کل وزیراعظم ہاؤس میں ہوگی۔

ذرائع کے مطابق وزیر اعظم عمران خان سے ملاقات کا مقصد کھلاڑیوں کے حوصلے کو بڑھانا ہے تاہم  وزیر اعظم عمران خان کی مصروفیت کو دیکھ کر کل وقت کا تعین ہوگا۔

پاکستان کرکٹ بورڈ (پی سی بی) کے چیئرمین رمیز راجہ بھی وزیر اعظم عمران خان سے ہونے والی ملاقات میں موجود ہوں گے۔

ذرائع کے مطابق ٹی ٹونٹی ورلڈ کپ اسکواڈ کے کھلاڑی نیشنل ٹی ٹونٹی کپ کے لیے اسلام آباد میں ہوں گے، نیشنل ٹی ٹونٹی کپ 23 ستمبر سے پنڈی اسٹیڈیم میں شروع ہو رہا ہے۔

واضح رہےکہ ٹی ٹونٹی ورلڈ کپ اسکواڈ کے کھلاڑیوں کو نیشنل ٹی ٹونٹی کھیلنے کا پابند کیا گیا ہے۔

دوسری جانب وزیرداخلہ شیخ رشید احمد نے کرکٹ کی مو جودہ صورتحال پر گفتگو کرتے ہوئے کہا کہ نیوزی لینڈ کرکٹ ٹیم نے آخری موقع پر دورہ منسوخی کا اعلان کیا ، کھیل گوروں کا ہے، ہماراشوق ہے، اسے شوق رہنا چاہیے ، نشہ نہیں بننا چاہیے۔

وفاقی وزیرشیخ رشید نے کہاکہ نیوزی لینڈ کرکٹ ٹیم کوہم نے پروٹوکول دیا، دو، دو ہیلی کاپٹرز اورفوج کی سیکیورٹی دی، نیوزی لینڈ کرکٹ ٹیم نہیں آتی تو نو ایشو ہم بھی منتظر نہیں ، غیرملکی ٹیموں کا دورہ منسوخی پرمیڈیا کواتنا سنجیدہ نہیں ہونا چاہیے۔

وزیرداخلہ نے کہاکہ نیوزی لینڈ ٹیم جہاں مقیم تھی وہاں آئی ایم ایف اوردیگر حکام بھی تھے۔ نیوزی لینڈ اوربرطانیہ کرکٹ ٹیم کے دورہ منسوخی ہلکی پھلکی موسیقی ہے۔

یاد رہےکہ گزشتہ ہفتے نیوزی لینڈ کی جانب سے اچانک دورہ منسوخ کیے جانے کے بعد انگلش کرکٹ بورڈ نے بھی اپنی ٹیم بھجوانے سے انکار کردیا تھا۔

انگلش کرکٹ بورڈ کی جانب سے جاری کی جانے والی پریس ریلیز میں کہا گیا کہ مینز اور ویمنز ٹیموں کو نہ بھیجنے کا فیصلہ کیا گیا ہے۔

ترجمان ای سی بی نے کہا کہ فیصلہ کھلاڑیوں کی ذہنی اور جسمانی صحت کے پیش نظر کیا جارہا ہے، خطے کی موجودہ صورتحال میں سفرکروا کر ان کو کسی دباﺅ کا شکار نہیں کرنا چاہتے، پی سی بی کے ساتھ ٹور ممکن بنانے کیلیے مثبت پیش رفت کی تھی، اندازہ ہے کہ فیصلہ مایوسی کا باعث بنے گا، اس کے بعد کرکٹ پر اثرات کے حوالے سے افسردہ ہیں۔