یوٹیلیٹی اسٹورز پر ایک بار پھر مختلف اشیاء مہنگی کر دی گئیں۔

تفصیلات کے مطابق ملک بھرمیں یوٹیلیٹی اسٹورز پر مختلف اشیاء کی قیمتوں میں مزید اضافے کا نوٹیفکیشن جاری کر دیا گیا ہے۔

ذرائع کے مطابق یوٹیلیٹی اسٹورز پر مختلف برانڈز کے صابن 3 سے 10 روپے تک مہنگے ہوگئے ہیں۔

ٹشو پیپراورنیپکن کی قیمتیں 3 سے 19 روپے تک بڑھا دی گئی ہیں۔

کپڑے دھونے کا صابن 22 روپے، ٹوائلٹ کلینر اور بلیچ کی قیمت 4 سے 12 روپے تک بڑھا دی گئی ہے۔ یوٹیلیٹی اسٹورز پر ملک کریم 10 روپے مہنگی کردی گئی ہے۔

ذرائع کے مطابق چند روز قبل بھی حکومت نے یوٹیلیٹی اسٹورز کی اشیاء کی قیمتوں میں اضافہ کیا تھا۔

یوٹیلیٹی اسٹورز حکام کا اس حوالے سے کہنا ہےکہ مختلف برانڈز نے قیمتوں میں اضافہ کیا ہے اور جس نرخ پر خریداری کی جاتی ہے اسی حساب سے ان کی قیمت مقرر کی جاتی ہے۔

حکام کے مطابق یوٹیلیٹی اسٹورز نے اپنے کسی برانڈ کی قیمت نہیں بڑھائی ہے۔

دوسری جانب بجلی کی قیمتوں میں ایک ماہ کیلئے 2 روپے 7 پیسے فی یونٹ اضافے کا امکان ہے۔

 سنٹرل پاور پرچیزنگ ایجنسی نے نیپرا کو بجلی مہنگی کرنے کی درخواست دے دی ہے ، درخواست اگست کی فیول پرائس ایڈجسٹمنٹ کی مد میں دی گئی ہے۔

درخواست میں کہا گیا ہے کہ ڈیزل اورفرنس آئل سے مہنگی ترین پیداواربجلی مہنگی ہونےکی وجہ ہے ، گزشتہ ماہ ڈیزل سے 22 روپے62 پیسے فی یونٹ اور فرنس آئل سے18 روپے 24 پیسے فی یونٹ بجلی پیداکی گئی۔

نیپرا کا کہنا ہے کہ سی پی پی اے کی درخواست پر 30 ستمبرکوسماعت ہو گی، منظوری کی صورت میں صارفین پر 25 ارب روپے کا بوجھ پڑے گا۔

واضح رہے رواں ماہ نیشنل الیکٹرک پاور ریگولیٹری اتھارٹی (نیپرا) نے بجلی کی قیمتوں 1روپے 38 پیسےفی یونٹ اضافہ کرتے ہوئے کہا تھا اضافے کا اطلاق صرف ستمبرکے بلوں پر ہوگا۔

بجلی کی قیمت میں اضافہ جولائی کے ماہانہ فیول ایڈجسٹمنٹ کی مد میں کیاگیا، فیصلے کا اطلاق ڈسکوزکے صارفین ماسوائے لائف لائن صارفین پرہوگا۔