قومی کرکٹ ٹیم کے ہیڈ کوچ مصباح الحق کا کہنا ہے کہ آسٹریلیا میں کھیلنا ایک چیلنج ہے، کنڈیشنز مختلف ضرور ہوتی ہیں لیکن کھیل کر انجوائے کرتے ہیں ۔

سڈنی کرکٹ گراونڈ میں پریکٹس سیشن سے قبل ہیڈ کوچ مصباح الحق نے میڈیا سے گفتگو میں کہا کہ ہر ٹیم کے لیے آسٹریلیا میں آکر کھیلنا ایک چیلنج ہوتا ہے، کنڈیشنز مختلف ہونے کے باجود انجوائے بھی کرتے ہیں ۔

مصباح الحق کا کہنا تھا کہ نوجوان کرکٹرز کے لیے یہاں کھیلنا ایک اچھا موقع ہے ،ہر ڈیپارٹمنٹ اگر کنڈیشنز کے مطابق کھیلا تو ہم اچھے نتائج دے سکتے ہیں۔

انہوں نے بتایا کہ نسیم شاہ اچھی بولنگ کر رہا ہے ہم سب پرجوش ہیں کہ وہ ٹیم میں شامل ہو کر یہاں بولنگ کرے، جبکہ عثمان قادر کو ٹیم میں آسٹریلیا میں تجربے کی وجہ سے شامل کیا ہے ۔

مصباح کا کہنا تھاکہ بابر ا عظم کےلیے کپتانی ایک نیا تجربہ ہے ، اظہر علی ٹیسٹ کے کامیاب بیٹسمین ہیں ، دونوں سے کہا کہ پہلا فوکس اپنی بیٹنگ پر رکھیں۔

ہیڈ کوچ نے کہا کہ سب کھلاڑی اپنے اپنے ڈیپارٹمنٹ پر فوکس کریں تو معاملات آسان ہو جاتے ہیں ، کوشش ہو گی کہ کارکردگی میں تسلسل ہو غیر متوقع کارکردگی آسٹریلیا کے لیے ہی نہیں ہمارے لیے بھی خطرہ ہے۔

یاد رہے کہ  قومی ٹیم آسٹریلیا  کیخلاف 3 ٹی ٹونٹی اور 2 ٹیسٹ میچز کھیلے گی۔ پہلا ٹی ٹونٹی 3 نومبر،دوسرا 5 اور تیسرا 8 نومبر کو کھیلا جائے گا۔

جبکہ ٹی ٹونٹی سیریز سے قبل دونوں ٹیموں  کے درمیان  وارم اپ میچ31 اکتوبر   کو کھیلاجائے گا۔