وزیر اعلیٰ گلگت بلتستان خالد خورشید نے کہا ہے کہ مستقل قیامِ امن حکومت کی اولین ترجیح ہے۔

تفصیلات کے مطابق وزیر اعلیٰ گلگت بلتستان خالد خورشید نے پارلیمانی امن کمیٹی کے اجلاس سے خطاب کرتے ہوئے کہا کہ مستقل قیامِ امن حکومت کی اولین ترجیح ہے، معاشی سرگرمیوں اور تعمیر و ترقی کا انحصار امن و امان سے وابستہ ہے، امن خراب کرنے اور حکومتی رٹ چیلنج کرنے والوں کیخلاف زیرو ٹارلنس کی پالیسی اختیار کی جائے گی۔

خالد خورشید نے کہا کہ پارلیمانی امن کمیٹی مساجد بورڈ کے قیام میں اپنا کردار ادا کرے، گلگت بلتستان میں تعمیر و ترقی کے نئے دور کا آغاز ہوا ہے، گلگت بلتستان ڈویلپمنٹ پیکیج کے تحت 370 ارب کے میگا ترقیاتی منصوبے منظور ہوئے ہیں، آئینی اصلاحات کے حوالے سے پیشرفت ہورہی ہے، حقیقی معنوں میں سزا و جزا کا قانون نافذ کریں گے، نیک نیتی اور تعصبات سے بالاتر ہوکر کام کریں تومستقل قیام امن کا حصول مشکل نہیں۔

وزیر اعلیٰ گلگت بلتستان کا کہنا تھا کہ عوام کے منتخب کئے گئے نمائندے پارلیمانی امن کمیٹی میں موجود ہیں، حکومت اور تمام ادارے قیام امن کیلئے پارلیمانی امن کمیٹی کے ساتھ ہیں، پارلیمانی امن کمیٹی کے تجاویز پر عملدرآمد کرایا جائے گا۔

وزیر اعلیٰ گلگت بلتستان خالد خورشید نے مزید کہا کہ ہم اپنے آنے والی نسلوں کو پرامن اور خوشحال گلگت بلتستان دیں گے، ماضی میں پولیس کی تعداد میں اضافے پر توجہ نہیں دیا گیا، بہت جلد گلگت بلتستان میں پولیس کے نفری میں اضافہ کیا جائے گا۔