وزیراعظم آزاد کشمیر سردار عبد القیوم نیازی نے کہا ہے کہ وزیر اعظم عمران خان نے فاشسٹ مودی کا چہرہ دنیا کے سامنے بے نقاب کر کے رکھ دیا۔

تفصیلات کے مطابق وزیراعظم آزاد کشمیر سردار عبد القیوم نیازی نے اقوام متحدہ کی جنرل اسمبلی سے خطاب پر وزیراعظم پاکستان عمران خان کو زبردست خراجِ تحسین پیش کیا، ان کا کہنا تھا کہ وزیراعظم عمران خان نے یو این جنرل اسمبلی خطاب میں کشمیریوں کی بھرپور ترجمانی کر کے کشمیر کا سفیر ہونے کا حق ادا کر دیا۔

سردار عبد القیوم نیازی نے کہا کہ وزیر اعظم عمران خان نے سید علی گیلانی کی میت کے معاملے کو بھی بھرپور انداز سے اٹھایا، وزیراعظم پاکستان و محسن کشمیر عمران خان نے اپنی تقریر سے کشمیریوں کے دل جیت لیے۔

وزیراعظم سردار عبد القیوم نیازی کا کہنا تھا کہ وزیر اعظم عمران خان نے بھارتی مظالم پر عالمی برادری کے دوہرے معیار کا تذکرہ کر کے عالمی ضمیر کو بھی جھنجھوڑا، سفیر کشمیر عمران خان نے آر ایس ایس کے نظریے اور بھارت میں مسلمانوں پر مظالم کو بھی بے نقاب کیا، وزیراعظم کے جنرل اسمبلی سے خطاب سے مسئلہ کشمیر پر عالمی حمایت میں مزید اضافہ ہوگا، مسئلہ کشمیر کو بھرپور طریقے سے اجاگر کرنے پر وزیراعظم پاکستان کے شکرگزار ہیں۔

وزیراعظم آزاد کشمیر سردار عبد القیوم نیازی سے تحریک انصاف کے ساتھ عمار ریاض ملک کے ہمراہ نو منتخب کنٹونمنٹ بورڈ گوجرانوالہ کے ممبران نے ملاقات کی، ملاقات میں نو منتخب ممبران نے کہا کہ وزیراعظم سردار عبد القیوم نیازی نے کنٹونمنٹ بورڈ کے الیکشن میں اہم کردار ادا کیا، سردار عبد القیوم نیازی کی کاوشوں سے گجرانوالہ کنٹونمنٹ بورڈ کے ممبران کی کامیابی ممکن ہوئی، ہم وزیراعظم آزاد کشمیر کے شکر گزار ہیں۔

منتخب ممبران کا مزید کہنا تھا کہ سردار عبد القیوم نیازی نے ہمیں بروقت اپنی رہنمائی فراہم کی اور ہماری کامیابی میں ہماری مدد کی، ہمیں یقین ہے کہ سردار عبد القیوم نیازی وزیراعظم پاکستان عمران خان کی امیدوں پر پورا اتریں گے اور آنے والے عام انتخابات میں تحریک انصاف پاکستان کی کامیابی کیلئے پاکستان میں مقیم مہاجرین کو متحرک کرنے میں اپنا اہم کردار ادا کریں گے۔