وزیر اوقاف سید سعید الحسن نے کہا ہے کہ عرس کے دوران کسی بھی محکمہ کی طرف سے غفلت برداشت نہیں کی جائے گی۔

تفصیلات کے مطابق وزیر اوقاف سید سعید الحسن نے دربار داتا گنج بخش ؒ کے سالانہ عرس مبارک کے سلسلے میں سکیورٹی و دیگر انتظامات کی چیکنگ کیلئے دورہ کیا، ان کے ہمراہ ایڈمنسٹریٹر داتا دربارخالد محمود سندھو کے علاوہ دیگر افسران بھی موجود تھے۔

وزیر اوقاف سید سعید الحسن نے دربار اور اس کے گرد و جوار میں بھی سکیورٹی انتظامات کا جائزہ لیا، انہوں نے انتظامیہ کو ہدایت کی کہ سکیورٹی کے سلسلے میں کسی بھی قسم کی معمولی کوتاہی بھی نہ ہونے دیں، عرس کے دنوں میں زائرین و عقیدت مندوں کو ہر قسم کی سہولیات کی فراہمی کو ترجیح دیں، صفائی ستھرائی کے انتظامات کو ہرصورت فوقیت اور اہمیت دی جائے۔

  ان کا کہنا تھا کہ داتا گنج بخش ؒ کا978 واں سالانہ عرس مبارک کی تقریبات شایان شان طریقہ سے منائی جائیں گی، عرس کے دوران پولیس، قومی رضا کار اور دیگر سکیورٹی ایجنسیوں کے اہلکاران اپنے فرائض انجام دیں گے۔

وزیر اوقاف سید سعید الحسن نے کہا کہ سکیورٹی کے لئے قرب و جوارا ور اطراف میں سی سی ٹی وی کیمروں کا جال بچھا دیا گیا ہے، لنگر اور دودھ کی سبیل کے لئے بھی دربار کے قرب و جوار میں پوائنٹس بنادئیے گئے ہیں، عرس کے دوران کسی بھی محکمہ کی طرف سے غفلت برداشت نہیں کی جائے گی۔