حکومت پنجاب کے ترجمان فیاض الحسن چوہان نے کہا ہے کہ بیوروکریسی میں حکومتی مداخلت کی داغ بیل شریف خاندان نے ڈالی۔

تفصیلات کے مطابق حکومت پنجاب کے ترجمان فیاض الحسن چوہان نے کہا ہے کہ باپ کی وزارتِ اعلیٰ کے دم پر سیاسی کیریئر بنانے والے حمزہ شہباز کو خاموش رہنا چاہیے۔

انہوں نے کہا کہ کرپٹ اور بددیانت باپ کا بیٹا ایک شریف النفس وزیر اعلیٰ پر الزام لگا رہا ہے ، حمزہ شہباز کا سردار عثمان بزدار پر الزام آسمان پر تھوکنے کے مترادف ہے ، شریف خاندان پر اربوں کی کرپشن اور غبن عدالتوں میں ثابت ہو چکے ہیں۔

فیاض الحسن چوہان نے کہا ہے کہ 25 ارب کی تازہ تازہ کرپشن انکی صلاحیتوں کا منہ بولتا ثبوت ہے ، شریف خاندان کے دس سالہ اقتدار کا کچا چٹھہ انہی کے دور کی آڈٹ رپورٹس کھول چکی ہیں ، 17500 ارب کی بے ضابطگیاں کرنے والے کس منہ سے شفافیت کی بات کرتے ہیں۔

حکومت پنجاب کے ترجمان فیاض الحسن چوہان نے کہا ہے کہ حمزہ شہباز میں رتی برابر غیرت ہے تو بیوروکریسی تبادلوں کے الزام پر ثبوت پیش کریں ، شہباز شریف نے سی ایم آفس کا تقدس پامال کرنے میں کوئی کسر نہ چھوڑی۔

اس سے قبل حکومت پنجاب کے ترجمان فیاض الحسن چوہان نے پیغام پاکستان کنونشن میں گفتگو کرتے ہوئے کہا تھا کہ پاکستان کی جغرافیائی اہمیت پوری دنیا کے ممالک سے زیادہ ہے جبکہ اب گوادر منصوبے اور پاکستان کے وسائل کی وجہ سے اہمیت اور بھی زیادہ ہے

حکومت پنجاب کے ترجمان نے کہا تھا کہ پاکستان کے پاس جدید ٹیکنالوجی ہے ، میزائل ہے اور ایٹمی طاقت ہے جبکہ پاکستان میں سمندر ہے اور  گرم پانی ہے۔

فیاض الحسن چوہان نے یہ بھی کہا تھا کہ سب سے بڑھ کر جذبہ جہاد سے لبریز فوج ہے جبکہ ان سب خصوصیات کی بنیاد پر دنیا کی بڑی طاقتیں جنگ کرنے سے سے پہلے سوچتی ہیں اور ان طاقتوں نے پاکستان سے لڑنے کے لیے ففتھ جنریشن وار اور فرقہ واریت جیسے ہتھکنڈے نکالے۔

حکومت پنجاب کے ترجمان کا کہنا تھا کہ سکوت بغداد سے لے کر ایران ، فلسطین اور اب ممالک میں توڑ پھوڑ سے کچھ نہیں ملا جبکہ نریندر مودی نے قسم کھائی ہوئی ہے کہ پاکستان کو توڑنا ہے۔

فیاض الحسن چوہان کا یہ بھی کہنا تھا کہ انڈیا میں معشیت کا بیڑا غرق کرنے والی ریاست کا ایجنڈا صرف پاکستان کو نقصان پہنچانا ہے جبکہ انڈیا کے میجر گورف نے ویڈیو اپ لوڈ کی ہے کہ پاکستان کو تباہ کرنا کونسا مشکل ہے لیکن دشمن سن لے کہ پاکستان سیریا نہیں ہے۔

حکومت پنجاب کے ترجمان فیاض الحسن چوہان کا مزید کہنا تھا کہ ہماری ذمہ داری ہے کہ خریدے ہوئے فرقہ واریت پھیلانے والے لوگوں سے آگاہ رہیں، کوئی دشمن بریلوی کے روپ میں کوئی سنی کے روپ میں اور کوئی شیعہ کے روپ میں انتہا پسندی پھیلا رہا ہے لیکن ہمارے علما کو خراج تحسین پیش کرتا ہوں کہ انھوں نے فرقہ واریت نہیں پھیلنے دی۔