وفاقی وزیر شیریں مزاری نے کہا ہے کہ دھاندلی کے الزامات کو ختم کرنے کیلئے ای وی ایم لانا چاہتے ہیں۔

تفصیلات کے مطابق اسپیکر اسد قیصر کی زیرِ صدارت قومی اسمبلی میں اجلاس ہوا جس میں وفاقی وزیر شیریں مزاری نے اظہارِ خیال کرتے ہوئے کہا کہ خواجہ آصف نے غلط بیانی کی ہے، انہوں نے حقائق کے برعکس بات کی۔

شیریں مزاری کا کہنا تھا کہ انتخابی اصلاحات کمیٹی کی سفارشات میں ای وی ایم اور سمندر پار پاکستانیوں کے ووٹ کا ذکر تھا، آزاد کشمیر الیکشن میں بھی دھاندلی کا الزامات لگائے گئے، دھاندلی کے ان الزامات کو ختم کرنے کیلئے ہی اے وی ایم لانا چاہتے ہیں۔

دوسری جانب قومی اسمبلی اجلاس میں پاکستان مسلم لیگ ن کے رہنما خواجہ محمد آصف نے اظہارِ خیال کرتے ہوئے کہا کہ طے ہوا تھا مشترکہ پارلیمانی کمیٹی میں سب کو نمائندگی ملے گی، مشترکہ پارلیمانی کمیٹی پراتفاق کیا گیا تھا، ہمیں نہیں حکومت کے لوگوں کو بھی اعتراض ہے، آج سے دھاندلی کا جھگڑا شروع ہوچکا ہے۔

خواجہ آصف نے کہا کہ حکومت کے خدشات ہیں کہ آئندہ الیکشن شفاف ہوئے تو اپوزیشن جیت جائے گی، ای وی ایم کو دنیا میں رول بیک کیا گیا، ای وی ایم پر صرف ہمیں ہی نہیں کچھ حکومتی لوگوں کو بھی اعتراض ہے، بہت سے ممالک میں ای وی ایم کو ختم کردیا گیا ہے۔

پاکستان مسلم لیگ ن کے رہنما خواجہ محمد آصف کا کہنا تھا کہ اسپیکر قومی اسمبلی پہلے ہی ایک اسپیشل کمیٹی تشکیل دے چکے ہیں، الیکشن ترمیمی ایکٹ 2017 متفقہ طور پر منظور کیا گیا ہے۔