کامیاب پاکستان پروگرام کے افتتاح کی تیاریاں مکمل ہوگئی ہیں۔

تفصیلات کے مطابق کامیاب پاکستان پروگرام کا افتتاح وزیر اعظم عمران خان 4 اکتوبر 2021  کو کریں گے۔

وزیر خزانہ شوکت ترین کا کہنا ہے کہ کامیاب پاکستان پروگرام اپنی نوعیت کا منفرد پروگرام ہے، کامیاب پاکستان پروگرام میں 14 سو ارب کے قرضے 37لاکھ گھرانوں کو دیے جائیں گے۔

ان کا کہنا تھا کہ کامیاب پاکستان پروگرام ملک میں غربت کے خاتمے میں کلیدی کردار ادا کرے گا جبکہ  یہ پروگرام معاشرے کے محروم طبقات کی زندگیاں بدلنے اور انہیں مالی لحاظ سے بااختیار بنانے کے لیے تشکیل دیا گیا ہے۔

 وزیر خزانہ شوکت ترین نے کہا کہ یہ یقیناً پاکستان میں اپنی طرز کا پہلا پروگرام ہے جس کے تحت مائیکروفنانس اداروں کے ذریعے بینکوں اور کم آمدنی والے طبقات کو آپس میں جوڑے گا، یہ غریب اور کمزور طبقات کے حوالے سے ریاست کے احساس ذمے داری کی عملی تعبیر ہے۔

انہوں نے کہا کہ کامیاب پاکستان پروگرام کے پانچ اجزاء ہیں، کامیاب کسان کے ذریعے کسانوں کو بلا سود قرضے دیے جائیں گے اور کاروبار کے لیے بھی پانچ لاکھ تک بلا سود قرضے دئیے جائیں گے۔

واضح رہے کہ حکومت پاکستان کے کامیابی سے جاری ہنر کی بنیاد پراسکالر شپ اسکیم کو بھی اس پروگرام سے منسلک کیا جائے گا اور صحت انصاف کارڈ کو بھی کامیاب پاکستان پروگرام کے ساتھ منسلک کیا جائے گا۔