صوبائی وزیر تعلیم پنجاب مراد راس نے کہا ہے کہ ہماری کوشش ہے کہ تمام 9 ڈویژن میں ٹرانسجینڈر اسکول کھولے جائیں۔

تفصیلات کے مطابق صوبائی وزیر تعلیم پنجاب مراد راس نے میڈیا سے گفتگو کرتے ہوئے کہا ہے کہ یہ ٹرانسجینڈر اسکول  دنیا کا پہلا اسکول ہے۔

انہوں نے کہا کہ ہم سے سوال کیا گیا تھا کہ انکو ریگولر اسکول میں کیوں نہیں ڈالا جا رہا ، ٹرانسجینڈرز کو اسکول سے خوف تھا مگر آج نئے ایڈمیشن آ رہے ہیں ، اسکول میں ٹرانسجینڈر بچوں سے ملا وہ بہت خوش ہیں اور پڑھ کر جاب کرنا چاہتے ہیں ، اگلا ٹرانسجینڈر اسکول لاہور میں کھولنے جا رہے ہیں۔

مراد راس نے کہا کہ سنگل نیشنل سلیبس کا یہ مطلب نہیں کہ صرف وہی کتابیں پڑھائیں جن کے پاس این او سی ہیں ، وہ اور کتابیں بھی پڑھا سکتے ہیں ، دانش اسکول ہم نے بند نہیں کیے بلکہ ڈے اسکالر کے لیے بھی کھول دیا ، پبلک ایجوکیشن کو جان بوجھ کر تباہ کیا گیا ، پرائیویٹ اسکولوں کو اوپر لے جانے کے لیے۔

صوبائی وزیر تعلیم پنجاب مراد راس نے کہا کہ ہمارے پانچ سال کے آخر میں کوئی خطرناک بلڈنگ باقی نہیں رہے گی ، 3 ہزار اسکولوں کے لیے واٹر فلٹر کولرز لا رہے ہیں جس پر کام جاری ہے۔

اس سے قبل صوبائی وزیر تعلیم پنجاب مراد راس نے ایجوکیشن ٹیکنالوجی کے حوالے سے منعقدہ آن لائن اجلاس میں شرکت کی اور خطاب کرتے ہوئے کہا تھا کہ ٹیکنالوجی کے جامع اور بھرپور استعمال کے بغیر شفافیت کو یقینی بنانا ناممکن ہے۔

انہوں نے کہا تھا کہ چند سال پہلے تک محکمہ تعلیم پنجاب میں ٹیکنالوجی کا استعمال نہ ہونے کی بدولت آن لائن ویڈیو کانفرنس  بھی ممکن نہیں تھی ، گزشتہ چند سالوں کے دوران محکمہ تعلیم پنجاب میں ٹیکنالوجی کے حوالے سے انقلابی تبدیلیاں رونما ہوئی ہیں۔

مراد راس نے کہا تھا کہ محکمہ تعلیم پنجاب میں ٹیکنالوجی کی مدد سے اب تک ایک لاکھ سے زائد اساتذہ کو آن لائن ٹریننگ دی جا چکی ہے ، کورونا وبا کے دوران طلبا کے تعلیمی نقصان کو کم سے کم رکھنے کے لیے آن لائن چینل تعلیم گھر کا قیام عمل میں لایا گیا۔

صوبائی وزیر تعلیم پنجاب مراد راس نے کہا تھا کہ نجی اسکولوں کی رجسٹریشن کے لیے آن لائن پورٹل بنایا جس پر اب تک ہزاروں نجی   اسکول اپنی رجسٹریشن با آسانی کروا چکے ہیں ، پاکستان بھر کے بچوں کے لیے ٹیکنالوجی کی مدد سے انصاف اکیڈمی کا قیام عمل میں لایا جا رہا ہے ، انصاف اکیڈمی کے قیام سے والدین کو اکیڈمی کلچر سے چھٹکارا ملے گا۔