یوٹیلیٹی اسٹورز پر مہنگائی کا نیا طوفان آگیا ہے ، جس کے باعث غریب عوام مزید پریشانی کا شکار ہو گئی ہے۔

تفصیلات کے مطابق حکومت کی جانب سے سستی اشیا خورو نوش فروخت کرنے والے یوٹیلیٹی اسٹورز پر دستیاب ڈالڈا گھی کی قیمت میں 109 روپے فی کلو تک اضافہ کر دیا گیا ہے۔

قیمتوں میں اضافے کا نوٹی فکیشن جاری کر دیا گیا ہے اور اس کا اطلاق فوری طور پر ہوگا۔

یوٹیلیٹی اسٹورز پر ڈالڈا گھی کا 10 لٹر کین 1090 روپے مہنگا ہوگیا ہے، 10 لٹر ڈالڈا گھی کا کین 2500 روپے بڑھ کر 3590 روپے کا ہوگیا ہے۔

یوٹیلیٹی اسٹورز پر 5 لٹر پلانٹا کوکنگ آئل کی قیمت میں 463 روپے اضافہ کیا گیا ہے۔ پلانٹا کوکنگ آئل کا 5 لیٹر کا ڈبا 1332 سے بڑھ کر 1795 روپے کا ہوگیا ہے۔

قیمتوں سے متعلق جاری کردہ نوٹی فیکشن کے مطابق یوٹیلیٹی اسٹورز پر من پسند کوکنگ آئل کی قیمتوں میں 465 روپے تک کا اضافہ کیا گیا ہے۔ من پسند 5 لٹر کوکنگ آئل ٹن کی قیمت 1245 سے بڑھ کر 1710 روپے ہوگئی ہے۔

میزان گھی کے 10 لٹر ٹن کی قیمت میں 475 روپے کا اضافہ ہو ہے، میزان گھی کے 10 لٹر ٹن کی قیمت 2885 سے بڑھ کر 3360 روپے ہوگئی ہے۔

واضح رہے ایک ماہ قبل 11 ستمبر کو بھی حکومت نے گھی کی قیمت میں اضافہ کیا تھا۔ ایک ماہ قبل مختلف برانڈز کے گھی کی قیمتوں میں 96 روپے تک فی کلو اضافہ کیا گیا تھا۔