وزیر خارجہ مخدوم شاہ محمود قریشی نے کہا ہے کہ پاکستان تحریک انصاف (پی ٹی آئی) عوام کو صحیح معنوں میں ریلیف کی فراہمی کیلئے کوشاں ہے۔

تفصیلات کے مطابق شہر اولیاء میں ترقی کیلئے سیاسی و انتظامی قیادت کا مشترکہ اجلاس ہوا جس میں وزیر خارجہ مخدوم شاہ محمود قریشی، وزیر توانائی ڈاکٹر اختر ملک، پارلیمانی سیکرٹری ندیم قریشی اور ڈپٹی کمشنر عامر کریم خاں نے شرکت کی۔

اجلاس میں وزیر خارجہ مخدوم شاہ محمود قریشی نے کہا کہ حکومت کے وژن کے مطابق ترقیاتی منصوبوں کی بروقت تکمیل پر فوکس کیا جائے، پاکستان تحریک انصاف (پی ٹی آئی) عوام کو صحیح معنوں میں ریلیف کی فراہمی کیلئے کوشاں ہے، شہر کی ٹریفک سسٹم کی بہتری کیلئے موثر پلان تشکیل دیا جائے۔

شاہ محمود قریشی کا کہنا تھا کہ کڈنی سینٹر کی توسیع کیلئے ڈی ایچ کیو کی نئی عمارت کے استعمال کرنے پر غور کیا جارہا ہے، ترقیاتی منصوبوں میں شفافیت کو قومی تعمیر نو کے محکمے یقینی بنائیں، سیوریج، تجاوزات اور صفائی کے معاملات پر خصوصی توجہ دینے کی ضرورت ہے۔

وزیر خارجہ مخدوم شاہ محمود قریشی نے کہا کہ حکومت اس خطے کی ترقی کیلئے وسائل فراہم کرنے کیلئے پرعزم ہے، ٹریفک کے مسائل حل کرنے کیلئے پارکنگ پلازوں کا پلان بنایا جائے۔

اجلاس میں ڈپٹی کمشنر عامر کریم خان نے کہا کہ اراکینِ اسمبلی کی تجویز کردہ اسکیموں کو ترجیح بنائیں گے، ضلعی کوارڈینیشن کمیٹی کے پلیٹ فارم پر نئے منصوبے تجویز کریں گے۔

صوبائی وزیر توانائی ڈاکٹر اختر ملک کا کہنا تھا کہ ماسٹر پلان کے تحت شہر کے انفراسٹرکچر کی بہتری کیلئے اقدامات کئے جائیں، منڈیوں اور لوہا و ٹمبر مارکیٹس کو شہر سے منتقل کرنے پر عمل درآمد کیا جائے، حکومت کی جانب سے شہر اولیاء کو سولر سٹی بنانے کی منظوری دے دی گئی ہے۔

پارلیمانی سیکرٹری ندیم قریشی نے کہا کہ ماسٹر پلان میں اندرون شہر کے انفراسٹرکچر کے منصوبے بھی شامل کئے جائیں، شہری علاقوں میں صفائی کے مثالی انتظامات یقینی بنائے جائیں۔

یاد رہے اجلاس میں معاون خصوصی جاوید اختر انصاری، چیف وہپ ملک عامر ڈوگر، ایم این اے احمد حسن ڈیہڑ، سی پی او منیر مسعود مارتھ، ایم پی اے ظہیر الدین علیزئی، سلیم لابر، سلمان نعیم سمیت اراکین اسمبلی بھی موجود تھے۔

ایم پی اے میاں طارق عبد اللہ، قاسم لنگاہ، وسیم خان بادوزئی، ٹکٹ ہولڈر خالد جاوید وڑائچ، بابر شاہ، عہدیدار اعجاز احمد لوٹھڑ، حافظ مشتاق، ملک اکرم کنہوں نے بھی اجلاس میں شرکت کی۔