پاکستان نے بھارت کی بے رحمانہ ہلاکتوں کی مذمت کی ہے۔

تفصیلات کے مطابق دفتر خارجہ کے ترجمان عاصم افتخار احمد نے بھارت مقبوضہ کشمیر میں بے رحمانہ ہلاکتوں کی شدید مذمت کرتے ہوئے کہا ہے کہ آج صبح تشدد کی ایک اور وحشیانہ واردات میں ، بھارتی قابض افواج نے مبینہ طور پر ایک اوربے گناہ کشمیری شاہد احمد کو قتل کیا۔

ترجمان دفتر خارجہ نے کہا کہ شاہد احمد کو اس وقت قتل کیا گیا جب وہ بھارتی مقبوضہ جموں و کشمیر میں شوپیاں کے علاقے زینا پورہ میں ایک رکاوٹ عبور کر رہا تھا، میڈیا کے ذریعہ شاہد احمد کی ہلاکت کی افسوسناک تصویر مقبوضہ کشمیرمیں ہ بھارت کی جاری بربریت کی عکاس ہے، جسے دینا کے ضمیر کو جھنجھوڑنا چاہیے۔

عاصم افتخار احمد کا کہنا تھا کہ بدقسمتی سے کشمیری عوام بھارتی قبضے اور ظلم کے سائے میں دائمی خوف اور دھمکی کے ماحول میں رہنے پر مجبور ہیں۔

ترجمان دفتر خارجہ نے کہا کہ بھارت دنیا کے سب سے بڑے عسکری علاقے میں معمول کے حالات کے من گھڑت پروپیگنڈے کو جاری رکھے ہوئے ہے جبکہ بی جے پی اور آر ایس ایس اتحاد کی حکمرانی میں بے گناہ کشمیریوں کا ماورائے عدالت قتل روزمرہ کا معمول ہے۔

عاصم افتخار احمد کا کہنا تھا کہ بھارت کو سمجھنا چاہیے کہ اس نے مقبوضہ علاقے میں اپنے مظالم کا جواز پیش کرنے کے لیے جو دہشت گردی کی تھی اس کا پردہ فاش کر دیا گیا ہے۔

ترجمان دفتر خارجہ کا یہ بھی کہنا تھا کہ بھارتی جارحیت اور انسانی حقوق کی منظم خلاف ورزیوں کے باوجود کشمیری عوام حق خودارادیت کے لیے اپنی جدوجہد میں پرعزم ہیں۔

عاصم افتخار احمد نے کہا کہ بھارت کو اپنے متنوع ہتھکنڈوں کو جاری رکھنے کے بجائے مقبوضہ جموںکشمیر کے میں بے گناہ کشمیریوں کی انسانی حقوق کی خلاف ورزیوں کو روکنا چاہیے۔

ترجمان دفتر خارجہ عاصم افتخار احمد نے مزید کہا کہ بھارت کواقوام متحدہ کی سلامتی کونسل کی متعلقہ قراردادوں اور کشمیری عوام کی خواہشات کے مطابق جموں و کشمیر کے پائیدار حل کے لیے سازگار ماحول پیدا کرنا چاہیے۔