وزیر اعلیٰ خیبرپختونخوا محمود خان نے کہا ہے کہ ہم کشمیری عوام کے ساتھ یکجہتی کا اظہار کررہے ہیں۔

تفصیلات کے مطابق وزیر اعلیٰ خیبرپختونخوا محمود خان نے میڈیا سے گفتگو کرتے ہوئے کہا ہے کہ کشمیریوں پر ظلم و ستم کا سلسلہ تھم نہ سکا ، کشمیری عوام کی اخلاقی،سیاسی اور سفارتی حمایت جاری رکھیں گے۔

 وزیر اعلیٰ خیبرپختونخوا محمود خان نے کہا ہے کہ نہتے کشمیری بھارتی ظلم کے سامنے سینہ سپر ہیں ، کشمیری عوام کے حوصلے پہاڑوں سے بھی بلند ہیں ، کشمیری عوام کو اپنی قسمت کا فیصلہ کرنے کا اختیار دیا جائے۔

 دوسری جانب امیر جماعت اسلامی سراج الحق نے یوم سیاہ کے موقع پر پیغام دیتے ہوئے کہا کہ اقوام متحدہ کشمیریوں کو حق خودارادیت کا حق دلائے۔

انہوں نے کہا کہ پی ٹی آئی حکومت نے کشمیر پر مکمل سرنڈر کیا ہے۔ پاکستانی 22 کروڑ عوام کے دل کشمیریوں کے ساتھ دھڑکتے ہیں، کشمیری عوام پاکستانی حکمرانوں کے رویوں پر سخت نالاں ہے۔

سراج الحق نے کہا کہ پاکستان اور کشمیر ایک دوسرے کے لیے لازم و ملزوم ہیں، کشمیری عوام کی جدوجہد کو سلام پپش کرتے ہیں، علی گیلانی شہید اور کشمیری قائدین کی قربانیاں ضرور رنگ لائیں گی۔

امیر جماعت اسلامی سراج الحق نے مزید کہا کہ بھارت کے تمام ظلم و جبر کے باوجود کشمیر آزاد ہوکر پاکستان کا حصہ بنے گا، مقبوضہ وادی میں انسانی حقوق کی شدید خلاف ورزیوں پر اقوام عالم خاموش کیوں؟ کشمیری عوام بھارت کے خلاف دنیا بھر میں یوم سیاہ اور یوم الحاق پاکستان منارہے ہیں۔