صدر مملکت ڈاکٹر عارف علوی نے کہا ہے کہ سرمایہ کاروں کو راغب کرنے کیلئے صوبوں میں کاروبار کرنے میں مزید آسانی پیدا کرنے کی ضرورت ہے۔

ڈاکٹر عارف علوی کو وزیر اعلیٰ ہاؤس میں کے پی حکومت کی کارکردگی، صوبے میں جاری ترقیاتی سرگرمیوں کے بارے میں بریفنگ دی گئی، بریفنگ میں وزیرِ اعلیٰ خیبر پختونخواہ ، محمود خان، صوبائی وزراء اور اعلیٰ صوبائی حکام نے شرکت کی۔

صدر مملکت کا کہنا تھا کہ کامیاب جوان پروگرام، انصاف روزگار اسکیم جیسے منصوبوں سے مستفید ہونے کیلئے نوجوانوں اور خواتین کو رہنمائی فراہم کرنے کی ضرورت ہے۔

انہوں نے کہا کہ صوبائی حکومتیں چیمبرز آف کامرس اینڈ انڈسٹری کے ساتھ نوجوانوں کو حکومت کی قرض اسکیموں کے بارے میں آگاہی فراہم کریں،  سرمایہ کاروں کو راغب کرنے کیلئے صوبوں میں کاروبار کرنے میں مزید آسانی پیدا کرنے کی ضرورت ہے۔

ڈاکٹر عارف علوی کا کہنا تھا کہ معدنیات اور کان کنی کے شعبے کی ترقی سے صوبے کے لوگوں کی ترقی اور مقامی آبادی کو روزگار کی فراہمی ممکن ہو سکے گی، خیبر پختونخواہ کے نئے ضم شدہ اضلاع میں تنازعات کے متبادل حل کے نظام سے لوگوں کو فوری اور سستا انصاف فراہم کیا جا سکے گا۔

صدر مملکت ڈاکٹر عارف علوی کا کہنا تھا کہ تنازعات کے متبادل حل کے نظام سے سابقہ فاٹا اضلاع میں عدلیہ پر بوجھ کم کرنے میں مدد ملے گی، کے پی حکومت سابقہ فاٹا کے نئے ضم شدہ اضلاع کی ترقی اور بہتری پر خصوصی توجہ دے رہی ہے۔

اجلاس میں ضم اضلاع میں تعلیم، صحت، سڑکوں، توانائی اور انتظامی انفراسٹرکچر بہتر بنانے کے منصوبوں پر پیش رفت کے بارے میں صدر مملکت کو بریفنگ دی گئی کہ سابقہ فاٹا اضلاع کا خیبر پختونخواہ میں انتظامی انضمام مکمل ہو چکا ہے، ضم شدہ اضلاع کے لئے 491 ارب روپے مالیت کے 901 منصوبے منظور کئے گئے ہیں۔

بریفنگ میں کہا گیا کہ صوبے میں جاری تمام ترقیاتی منصوبے مقررہ وقت کے مطابق مکمل ہو جائیں گے۔

صدر مملکت ڈاکٹر عارف علوی نے کے پی حکومت کی 3 سالہ کارکردگی کو سراہا اور ضم اضلاع کی عوام کے مسائل کے حل کیلئے مشاورتی سیشن کے باقاعدہ انعقاد پر صوبائی حکومت کی تعریف کی۔

معیاری صحت سہولیات کی فراہمی کیلئے صحت انصاف کارڈ کی سہولت ضم اضلاع تک بڑھانے پر صدر مملکت نے اظہار اطمینان کیا۔