چیئرمین سینیٹ محمد صادق سنجرانی نے کہا ہے کہ موجودہ ٹی 20 ورلڈ کپ کے تمام میچوں میں قومی ٹیم کی کارکردگی قابلِ تحسین رہی ہے۔

محمد صادق سنجرانی نے قومی کرکٹ ٹیم کے لئے نیک خواہشات کا اظہار کرتے ہوئے کہا کہ پاکستان کی کرکٹ ٹیم نے اب تک ٹی 20 ورلڈ کپ میں شاندار کھیل پیش کیا ہے، قومی ٹیم سیمی فائنل میں بھی آسٹریلیا کے خلاف بہترین کارکردگی دکھائے گی۔

چیئرمین سینیٹ محمد صادق سنجرانی کا مزید کہنا تھا کہ موجودہ ٹی 20 ورلڈ کپ کے تمام میچوں میں قومی ٹیم کی کارکردگی قابلِ تحسین رہی ہے، فائنل تک رسائی کے لئے قومی ٹیم میں بھرپور صلاحیت موجود ہے، قوم کی دعاؤں سے ٹیم ورلڈ کپ اپنے نام کرے گی۔

یاد رہے کہ پاکستان اور آسٹریلیا کی ٹیمیں آج ٹی ٹوئنٹی ورلڈ کپ کے دوسرے سیمی فائنل میں مد مقابل آئیں گی، دونوں ٹیموں کے مابین میچ دبئی میں پاکستانی وقت کے مطابق شام 7 بجے کھیلا جائے گا۔

گزشتہ روز پاکستان کرکٹ ٹیم کے کیمپ سے یہ اطلاعات سامنے آئی تھیں کہ وکٹ کیپر بلے باز محمد رضوان اور مڈل آرڈر میں کھیلنے والے شعیب ملک کو فلو ہوگیا ہے۔

ٹیم انتظامیہ کا کہنا ہے کہ دونوں کھلاڑیوں کے کورونا ٹیسٹ کیے گئے جو منفی آئے تھے تاہم دونوں کھلاڑیوں کی مانیٹرنگ کی جارہی ہے اور میچ میں کھلانے یا نہ کھلانے کا فیصلہ میچ سے کچھ دیر قبل ہی کیا جائے گا۔

ذرائع کا کہنا ہے کہ شعیب ملک اور محمد رضوان کی طبیعت بہتر نہ ہونے کی صورت میں سرفراز احمد اور حیدر علی کو پلئینگ الیون میں شامل کیا جائے گا۔ واضح رہے کہ یہ پہلا موقع نہیں جب پاکستان اور آسٹریلیا کسی بھی آئی سی سی عالمی کپ کے ناک آؤٹ مرحلے میں مد مقابل  آئیں گے۔

اس سے قبل پاکستان اور آسٹریلیا پانچ مرتبہ ناک آؤٹ مقابلے میں مدمقابل آئے اور پانچوں مرتبہ آسٹریلیا کو ہی فتح نصیب ہوئی۔

دونوں ٹیمیں 2010  کے ٹی ٹوئنٹی ورلڈکپ کے سیمی فائنل میں سنسنی خیز مقابلے سے شائقین کو محظوظ کرچکی ہیں جہاں مائیکل ہسی نے جادوگر کے نام سے مشہور اسپنر سعید اجمل کو لگاتار تین چھکے لگاکر پاکستان سے یقنی فتح چھین لی تھی۔

سوشل میڈیا پر شائقین کرکٹ کے ساتھ ساتھ خود سعید اجمل کی جانب سے بھی قومی ٹیم سے اس شکست کا بدلہ لینے کا مطالبہ کیا جارہا ہے۔

یاد رہے کہ ٹی ٹوئنٹی ورلڈ کپ 2021 میں پاکستان واحد ناقابل شکست ٹیم ہے اور بابر الیون نے 5 میچز کے دوران ٹیم میں کوئی تبدیلی نہیں کی ہے۔

دوسری جانب گزشتہ روز کھیلے گئے پہلے سیمی فائنل میں نیوزی لینڈ نے سنسنی خیز مقابلے کے بعد انگلینڈ کو 5 وکٹوں سے شکست دے دی تھی۔