صوبائی وزیر صنعت و تجارت میاں اسلم اقبال نے کہا ہے کہ عوام کو بہتر طبی سہولیات کی فراہمی حکومت کی پہلی ترجیح ہے۔

میاں اسلم اقبال نے گورنمنٹ ہسپتال سمن آباد کے توسیعی منصوبے کے تعمیراتی کاموں کا افتتاح کردیا ہے، اس موقع پر گورنمنٹ ہسپتال سمن آباد ڈاکٹر ادریس، پی ایچ ایف ایم سی کے افسران بھی موجود تھے۔

اس موقع پر صوبائی وزیر میاں اسلم اقبال نے میڈیا سے گفتگو کرتے ہوئے کہا کہ توسیعی منصوبے کے تحت ہسپتال میں بیڈز کی تعداد 25 سے بڑھا کر 60 کردی جائے گی، ہسپتال میں پیڈز نرسری اور ڈائلسز کی سہولت بھی فراہم ہوگی، توسیعی منصوبہ 7 کروڑ 5 لاکھ روپے کی لاگت سے 24 ماہ میں مکمل ہوگا۔

انہوں نے کہا کہ عوام کو بہتر طبی سہولیات کی فراہمی حکومت کی پہلی ترجیح ہے، یونیورسل ہیلتھ انشورنس پروگرام کے تحت پنجاب کی 100 فیصد آبادی کو علاج کی معیاری سہولتیں مفت دیں گے، ہیلتھ انشورنس کا یہ انقلابی پروگرام جدید ہیلتھ کیئر سسٹم کے قیام میں سنگ میل ثابت ہوگا۔

میاں اسلم اقبال کا کہنا تھا کہ صوبے میں کروڑوں روپے کی لاگت سے جدید طبی سہولتوں سے آراستہ نئے ہسپتال بنائے جا رہے ہیں، سمن آباد ہسپتال کے توسیعی منصوبے سے علاقے کے عوام کو بہتر طبی سہولیات ملیں گی۔

انہوں نے کہا کہ میں نے سمن آباد ہسپتال کی بنیاد 60 بستروں کے ہسپتال کے طور پر رکھی تھی، بد قسمتی سے ماضی کی حکومت نے اسے 25 بستروں تک محدود کردیا، اب دوبارہ توسیعی منصوبے کے تحت بستروں کی تعداد 60 تک بڑھائی جارہی ہے۔

صوبائی وزیر صنعت و تجارت میاں اسلم اقبال نے کہا کہ ہسپتال کے ڈاکٹروں اور نرسوں کے لئے رہائش گاہیں بھی بنائیں گے، ڈاکٹرز اور طبی عملہ دکھی انسانیت کی خدمت میں کوئی کسر اٹھا نہ رکھے۔

واضح رہے کہ میاں اسلم اقبال نے ہسپتال میں دستیاب طبی سہولیات کا بھی جائزہ لیا۔