ترجمان وزیر اعظم، معاون خصوصی برائے سیاسی ابلاغ ڈاکٹر شہباز گِل نے کہا ہے کہ پی ڈی ایم چور، کرپٹ اور مسترد شدہ افراد کا ٹولہ ہے۔

 ڈاکٹر شہباز گِل نے مولانا فضل الرحمن اور شاہد خاقان عباسی کے بیان پر رد عمل دیتے ہوئے کہا کہ مولانا فضل الرحمن ناجائز دولت بچانے کیلئے اکھٹا ہوا جتھا جمہوریت کے بھاشن دے رہا ہے، پی ڈی ایم چور، کرپٹ اور مسترد شدہ افراد کا ٹولہ ہے، کرپشن کیلئے ایوان کو استعمال کرنے والے جمہوریت اور جمہور کی بات کرتے ہوئے شرم کرے۔

ان کا کہنا تھا کہ خاندانی سیاست اور شہنشاہیت کو جمہوریت کے ورق میں لپیٹ کر پیش کرنا منافقت ہے، شاہد خاقان جیسے درباری جمہوریت کے لبادے میں خاندانی غلامی کر رہے ہیں، موجودہ حکومت میں مولانا بے روزگار ہیں اورنوکری ملنے کا کوئی امکان بھی نہیں۔

انہوں نے کہا کہ مولانا کے نزدیک اقتدار میں اُن کی شراکت داری ہی اصل جمہوریت ہے، وزیر اعظم عمران خان نے آ کر رینٹ پر دستیاب عناصر کی سیاست دفن کی، الیکشن چور ووٹ پر ڈاکہ ڈالنے والے الیکشن اصلاحات سے مفرور ہیں۔

ڈاکٹر شہباز گِل کا کہنا تھا کہ ماضی میں الیکشنز ہائی جیک کرنے والے شفافیت سے خائف ہیں، پی ڈی ایم ڈمی موومنٹ کے سوا کچھ نہیں، عوامی مسائل اور ملکی معاشی صورتحال کے ذمہ دار احتجاج میں مصروف ہیں، مہنگائی پر سیاست سراسر منافقت ہے۔

ترجمان وزیر اعظم، معاون خصوصی برائے سیاسی ابلاغ ڈاکٹر شہباز گِل نے مزید کہا کہ عالمی دنیا میں مہنگائی تاریخی بلندی پر ہے، نا اہل جس مہنگائی کا رونا رو رہے ہیں اس کے ذمہ دار بھی خود ہیں۔

واضح رہے کہ پی ڈی ایم کے تحت مہنگاٸی کے خلاف کراچی میں احتجاجی مظاہرے جاری ہیں جس میں سابق وزیر اعظم شاہد خاقان عباسی نے خطاب کرتے ہوئے کہا تھا کہ احتجاجی مظاہرے کا واحد مقصد یہ ہے کہ عوام کے بغیر ووٹوں سے آئی حکومت کو ہٹانا ، جس نے عوام کو تکلیف میں مبتلا کیا ہے۔

انہوں نے کہا تھا کہ پی ڈی ایم آئین کی بالادستی کی بات کرتی ہے، پی ڈی ایم اقتدار میں حصے کی بات نہیں کرتی ، احتجاجی مظاہرے میں ایوانوں میں موجود آٹھ جماعتوں کے نمائندے موجود ہیں ، تمام جماعتیں متفق ہیں کہ تمام ادارے آئین کے مطابق کام کریں۔

سابق وزیر اعظم نے کہا تھا کہ عوام مہنگائی کی چکی میں پس رہی ہے، عوام اس نظام کو قبول کرنے کے لئے تیار نہیں ہے، 2018 میں الیکشن چوری کیا گیا، عوام کی رائے کا احترام نہیں کیا گیا۔

شاہد خاقان عباسی کا کہنا تھا کہ موجودہ حکمران مہنگائی کی بات نہیں کرتے، مہنگائی سے ہر شخص پریشان ہے، مہنگائی کی وجہ 2018 کے الیکشن کی چوری ہے ، وزیر اعظم کہتے ہیں کہ دنیا بھر میں مہنگائی بڑھی ہے ، وزیر اعظم صاحب ہم لندن میں نہیں پاکستان میں رہتے ہیں۔

سابق وزیر اعظم شاہد خاقان عباسی نے مزید کہا تھا کہ یہ بتائیں 30 روپے کا آٹا 80 روپے میں کیوں فروخت ہورہا ہے؟ عوام مہنگائی بے روزگاری سے پریشان ہے، تمام مسائل کا واحد حل فوری شفاف انتخابات ہیں ، 50 روپے کی چینی 150 روپے میں فروخت کیوں ہو رہی ہے؟

دوسری جانب پی ڈی ایم کے تحت مہنگائی کے خلاف کراچی میں احتجاجی مظاہرے سے مولانا فضل الرحمان نے خطاب کرتے ہوئے کہا تھا کہ مہنگائی کی وجہ سے عوام کی یہ حالت ہو چکی ہے کہ پارلیمنٹ لاجز کے سامنے لوگوں نے اپنے بچے برائے فروخت کے بورڈ لگا رکھے ہیں، بچوں کو زہر دینے کے بعد ماں باپ خودکشی کرتے ہیں کہاں تک پہنچ گئے ہم لوگ، یہ حکومت چوری کے ووٹوں سے آئی ہے یہ حکومت نالائق ہے نا اہل ہے۔

مولانا فضل الرحمان نے کہا کہ ناپاک، ناجائز حکمرانوں کو اگر بحر عرب میں غرق نہ کیا تو پاکستان کی بقاء کا سوال کھڑا ہوگا، ہم بھیک مانگ کر دن رات گزار رہے ہیں، در در کی ٹھوکریں کھانے سے موجودہ حکمرانوں کی وجہ سے 22 کروڑ عوام کی رسواٸی ہو رہی ہے۔

ان کا کہنا تھا کہ موجودہ نا اہل حکمرانوں کو حکومت کرنے کا حق نہیں ہے، آج ہر کوئی مایوسی کی طرف جارہا ہے، اگر آج سیاسی قیادت نے اپنا کردار ادا نہ کیا تو پوری قوم سیاست سے مایوس ہو جائے گی، ہم اداروں سے بھی کہنا چاہتے ہیں کہ حقائق کو جانیئے، جن سے غلطی ہوئی ہے وہ قوم سے معافی مانگے۔

سربراہ جے یو آئی نے کہا کہ پی ڈی ایم پاکستان کی بقاء کی جنگ لڑ رہی ہے، یہ جدوجہد جاری رہے گی۔