امیر جماعت اسلامی سراج الحق نے کہا ہے کہ حکومت اوراپوزیشن دو ممبرز اِدھر اور تین ممبرز اُدھر کی گنتی میں مگن ہیں۔

سراج الحق نے اپنے جاری کردہ ایک بیان میں کہا کہ اسلام آباد میں شطرنج کا کھیل جاری ہے، حکومت اوراپوزیشن دو ممبرز اِدھر اور تین ممبرز اُدھر کی گنتی میں مگن ہیں، سیاسی جغادری جوڑ توڑ لگا رہے ہیں کہ ایسا ہو جائے، ویسا ہو جائے، حکمران اشرافیہ کی چالوں کا عوام کو کوئی فائدہ نہیں ہوگا۔

ان کا کہنا تھا کہ حکمران اشرافیہ کی چالیں اپنے مفادات کے لیے ہیں، قوم کے پاس واحد راستہ سٹیٹس کو سے نجات ہے، وڈیرے، جاگیردار دہائیوں سے عوام پر مسلط ہیں، ہماری نسلیں حکمران اشرافیہ کی نسلوں کی غلام ہیں۔

انہوں نے کہا کہ جمہوریت کی بات کرنے والی جماعتوں میں خود جمہوریت نہیں، ہم پی ڈی ایم کا حصہ نہیں بنے کیوں کہ اس کی اور حکمرانوں کی پالیسیوں میں کوئی فرق نہیں۔

امیر جماعت اسلامی سراج الحق کا مزید کہنا تھا کہ وکلا کی آئین کی بالادستی اور جمہوریت کے لیے لمبی جدوجہد ہے، جماعت اسلامی وکلا کی جدوجہد کو سلام پیش کرتی ہے، وکلا کی جدوجہد کے باوجود آج بھی ملک میں دو نظام رائج ہیں،عدالت میں غریب کو انصاف نہیں ملتا، احتساب کا نظام درہم برہم ہے، اشرافیہ کے لیے الگ اور غریبوں کے لیے الگ نظام ہے۔