صوبائی وزیر صحت ڈاکٹر یاسمین راشد نے کہا ہے کہ خسرہ و روبیلا سے بچاؤ کی قومی مہم کو کامیاب بنانے کیلئے تمام اسٹیک ہولڈرز کا کردار اہم ہے۔

ڈاکٹر یاسمین راشد نے محکمہ پرائمری اینڈ سیکنڈری ہیلتھ کئیرمیں خسرہ و روبیلا سے بچاؤ کی قومی مہم کے سلسلے میں آگاہی موبائل وین کا افتتاح کردیا ہے، اس موقع پر اسپیشل سیکرٹری صالحہ سعید اور ہیلتھ اسپیشلسٹ یونیسف ڈاکٹر طاہر منظور و دیگرافسران موجود تھے۔

صوبائی وزیر صحت ڈاکٹر یاسمین راشد نے اظہارِ خیال کرتے ہوئے کہا کہ لاہور شہر کے باسیوں کی خسرہ و روبیلا سے بچاؤ کی قومی مہم بارے آگاہی کیلئے موبائل وینز کو ڈیزائن کروایا گیا ہے، یہ آگاہی موبائل وینز پورے شہر میں لاہوریوں کو خسرہ و روبیلا بیماری سے بچاؤ کا پیغام دیں گی۔

ان کا کہنا تھا کہ پنجاب میں 15 سے 27 نومبر تک خسرہ و روبیلا سے بچاؤ کی قومی مہم چلائی جائے گی، اس مہم کے دوران 9 ماہ سے 15 سال تک کے پونے 5 کروڑ بچوں کو خسرہ و روبیلا کے حفاظتی ٹیکے لگائے جائیں گے۔

ڈاکٹر یاسمین راشد نے کہا کہ خسرہ و روبیلا سے بچاؤ کی قومی مہم کے دوران روزانہ کی سطح پر37 لاکھ بچوں کو حفاظتی ٹیکے لگائے جائیں گے، خسرہ و روبیلا سے بچاؤ کی قومی مہم کو کامیاب بنانے کیلئے تمام اسٹیک ہولڈرز کا کردار اہم ہے۔

انہوں نے کہا کہ خسرہ و روبیلا سے بچاؤ کی قومی مہم بنیادی طور پر ہماری نسلوں کو بچانے کی مہم ہے، والدین خسرہ و روبیلا سے بچاؤ کی قومی مہم کے دوران اپنے بچوں کو حفاظتی ٹیکے ضرور لگوائیں، ہماری حکومت نے پہلے دن سے پروینشن پر کام کیا ہے، حکومتِ پنجاب بچوں کو مختلف بیماریوں سے بچانے کیلئے بنیادی اقدامات اٹھا رہی ہے۔

صوبائی وزیر صحت ڈاکٹر یاسمین راشد کا مزید کہنا تھا کہ دورانِ حمل خسرہ و روبیلا کی شکایت پر پیدا ہونے والے بچہ بھی بیمار ہوسکتا ہے، پنجاب کے بچوں کی صحت کو یقینی بنانے کیلئے حفاظتی اقدامات اٹھاتے رہیں گے۔