وزیراعظم عمران خان سے قانونی ٹیم کی ملاقات ہوئی ہے۔

وزیراعظم عمران خان نے وزیر قانون فروغ نسیم، بیرسٹر علی ظفر اور اٹارنی جنرل خالد جاوید خان سے ملاقات کی ۔

اس ملاقات میں کل پارلیمنٹ کے مشترکہ اجلاس میں پیش ہونے والے بلز پر تفصیلی مشاورت کی گئی۔

ذرائع کے مطابق اٹارنی جنرل نے وزیراعظم کو اسلام آباد ہائی کورٹ میں سابق جج رانا شمیم کیس پر بھی بریفنگ دی۔

ملاقات  کے بعد سینیٹر علی ظفر نے گفتگو کرتے ہوئے کہاکہ 20 سے زائد قوانین مشترکہ اجلاس سے منظور کرائیں گے۔

 انہوں نے بتایا کہ کوشش کریں گے بحث کرا کے اتفاق رائے سے بل منظور کرائیں ، بہت سے بل پہلے ہی قائمہ کمیٹیوں سے منظور ہو چکے ہیں۔

بیرسٹر علی ظفر نے مزید کہاکہ کوشش کریں گے ایک ہی دن میں قانونی سازی نمٹا دیں۔

دوسری جانب پاکستان مسلم لیگ (ن) کے صدر اور قائد حزب اختلاف شہباز شریف نے کہا ہے کہ عوام کو مہنگائی کے وبال میں مبتلا کرنے والی حکومت سیاہ قوانین سے زندگی نہیں پا سکتی۔

شہباز شریف کی زیرِ صدارت متحدہ اپوزیشن رہنماﺅں سے اہم مشاورتی اجلاس پارلیمنٹ ہاﺅس میں اپوزیشن چیمبر میں منقعد ہوا، جس میں سید خورشید شاہ، یوسف رضا گیلانی، مولانا اسعد نے شرکت کی۔

ان کے ساتھ ساتھ اجلاس میں سابق وزیر اعظم شاہد خاقان عباسی اور مسلم لیگ (ن) کے پارلیمانی لیڈر خواجہ محمد آصف ، سابق اسپیکر قومی اسمبلی سردار ایاز صادق، رانا ثناء اللہ کے علاوہ اپوزیشن جماعتوں کے دیگر اراکین پارلیمان نے بھی شرکت کی۔

اس موقع پر پارلیمنٹ کے کل کے مشترکہ اجلاس کے لئے متحدہ اپوزیشن نے حکمت عملی طے کرلی۔

اجلاس میں متحدہ اپوزیشن نےعزم کا اظہار کرتے ہوئے کہا کہ پوری قوت سے حکومت کی سیاہ قانون سازی کا راستہ روکیں گے، اجلاس میں اتفاق ہوا کہ تمام اپوزیشن اراکین پارلیمان کو اپنی حاضری یقینی بنانے کی ہدایت دیں۔

اجلاس میں فیصلہ ہوا کہ متحدہ اپوزیشن کے قائدین اپنی اپنی جماعتوں کے اراکین کی حاضری یقینی بنائیں گے ۔

پاکستان مسلم لیگ (ن) کے صدر شہباز شریف کا کہنا تھا کہ ملک کو معاشی زوال اورعوام کو مہنگائی کے وبال میں مبتلا کرنے والی ظالم حکومت سیاہ قوانین سے زندگی نہیں پا سکتی۔

اپوزیشن نے اجلاس میں اظہارِ خیال کیا کہ حکومت گرتی ہوئی دیوار ہے، سہارے اسے بچا نہیں سکتے۔