عراق میں حکومت مخالف مظاہروں میں شریک  مظاہرین پرسیکیورٹی  فورسزکی فائرنگ مزید سات افراد جاں بحق اورمتعددزخمی ہوگئےہیں۔

غیرملکی خبررساں ادارے کی رپورٹ کے مطابق عراق میں ہونے والے حکومت مخالف مظاہروں نے ایک بار پھر شدت اختیار کرلی ہے، گزشتہ چوبیس گھنٹوں کے دوران بغداد اور بصرہ میں مزید 07 افراد سیکیورٹی فورسز کی فائرنگ سے جاں بحق ہوئے۔

رپورٹ کے مطابق جاں بحق ہونے والے افراد کو دارالحکومت بغداد میں نشانہ بنایا گیا، حالیہ ہلاکتوں کے بعد اب تک مجموعی طور پرجاں بحق ہونے والے مظاہرین کی تعداد 267 سے تجاوز کرگئی۔

بغداد میں سیکیورٹی فورسز نے مظاہرین پر آنسو گیس کی شیلنگ اور فائرنگ کی جس کے نتیجے میں چار افراد ہلاک ہوئے جبکہ بصرہ میں سیکیورٹی فورسز کے کریک ڈاون سے تین افراد جاں بحق ہوئے۔

کربلا میں بھی سیکیورٹی فورسز کی جانب سے مظاہرین پر شدید شیلنگ کی گئی جس کے باعث مظاہرین کے متعدد خیمے جل گئے۔ جبکہ  گزشتہ  دنوں  کربلا میں  مظاہرین نے  ایرانی  قونصلیٹ پر   حملہ کیا تھا  جہاں  انہوں نےایران کاجھنڈااتارکراپنےملک عراق  کاجھنڈالہرایا تھا  ۔

واضح رہے کہ عراق میں گزشتہ ماہ سےبدعنوانی اوربے روزگاری کےخلاف شدید احتجاج کیاجارہاہے اور مظاہرین حکومت سے مستعفی ہونے کا مطالبہ کیاتھا ۔ ان مظاہروں کا سلسلہ ایک ماہ سے جاری ہے جس کے دوران سکیورٹی فورسز کی فائرنگ سے 267 افراد ہلاک اور سیکڑوں زخمی ہوچکے ہیں۔

 جبکہ گزشتہ دنوں عراقی صدر نے اپنے سرکاری خطاب میں ملک بھر میں نئے انتخابات کرانے کا عندیہ دیتے ہوئے بتایا تھا کہ وزیر اعظم عادل عبدالمحمدی عہدہ مشروط طور پر چھوڑنے کے لیے تیار ہیں۔