شاہدخاقان عباسی کا کہنا ہےکہ ای وی ایم سے چوری کے ثبوت بھی مٹ جائیں گے۔

مسلم لیگ ن کے مرکزی رہنما اور سابق وزیراعظم شاہد خاقان عباسی نے میڈیا سے  گفتگو کرتے ہوئے کہاکہ حکومت کا ہر معاملہ بدنیتی پر مبنی ہے ، الیکشن چوری ہوتے ہیں،الیکشن چوری کی اصلاح کرناچاہتےہیں۔

انہوں نے کہاکہ نام نہاد انتخابی اصلاحات کی بات ہوئی ہے ، الیکشن کمیشن کےاختیارات پر ڈاکا ڈالنا ہے ، ای وی ایم دنیا میں ناکام ہوچکی ہیں۔

شاہدخاقان عباسی کا کہنا تھا کہ ملک میں الیکشن کا نظام متنازع نہیں ، ملک میں الیکشن کے انعقاد کا نظام متنازع ہے ، الیکشن چوری کو سہولت دینے کے قوانین ہیں۔

سابق وزیراعظم نے کہاکہ کل جوقوانین بنے ان میں کلبھوشن کو گھربھیجنےکاپروگرام ہے،ایک آرڈیننس جاری کردیتے، قانون بنانے کی کیا ضرورت تھی۔

مسلم لیگی رہنما نے مزید کہاکہ گزشتہ روز ایوان کی کارروائی سب کے سامنے ہے۔

دوسری جانب فواد چوہدری کا کہنا ہے کہ شریف اور زرداری فیملی سیاست قصہ پارینہ ہے، اب اپوزیشن میں بھی نئے کھلاڑیوں کی باری ہے۔

وفاقی وزیر اطلاعات ونشریات فواد چوہدری نے ٹوئٹر پر جاری اپنے پیغام میں لکھا کہ اگلے دو سال پاکستان کی تاریخ کے اگلے دو عشروں کی سیاست طے کریں گے، 1990 کی دہائی کی سیاست کا مکمل اختتام اگلے دو سالوں میں طے ہے۔

شریف زرداری فیملی سیاست قصہ پارینہ ہے، اب اپوزیشن میں بھی نئے کھلاڑیوں کی باری ہے، اگلے دو سال پاکستان کی تاریخ کے اگلے دو عشروں کی سیاست طے کریں گے، 1990 کی دھائ کی سیاست کا مکمل اختتام اگلے دو سالوں میں طے ہے۔— Ch Fawad Hussain (@fawadchaudhry) November 18, 2021

انہوں نے کہا کہ اپوزیشن کو ایک بار پھر کہتا ہوں عدالت کے بجائے اسپیکر آفس آئے، اصلاحات کیلئے اپوزیشن کی تجاویز کا خیرمقدم کریں گے۔

وفاقی وزیر اطلاعات و نشریات نےکہا کہ ای وی ایم کے نظام کو پہلے سمجھیں، تمام خدشات دور کریں گے، اوورسیز پاکستانیوں کے ووٹ کے حق پر پیچھے نہیں ہٹ سکتے، یہ ہمارا انتخابی وعدہ تھا۔

واضح رہے کہ گزشتہ روز پارلیمنٹ کے مشترکہ اجلاس میں الیکٹرانک ووٹنگ مشین اور سمندر پار پاکستانیوں کو ووٹنگ کے حق سمیت دیگر بل منظور ہوگئے۔

قومی اسمبلی اور سینیٹ کے مشترکہ اجلاس میں حکومت کی عددی برتری ثابت ہوگئی۔

انتخابی اصلاحات ترمیمی بل پیش کرنے کی تحریک منظور کرلی گئی، جس میں حکومت کے حق میں 221 ووٹ اور مخالفت میں 203 ووٹ ملے، بل کی شق وار منظوری کا عمل جاری ہے۔

اس سے قبل انتخابات ترمیم دوم بل 2021 پیش کرنے کی تحریک کثرت رائے سے منظور کرلی گئی۔

پارلیمنٹ کے مشترکہ اجلاس میں مشیر پارلیمانی امور بابر اعوان کی جانب سے انتخابی ترمیم دوم بل 2021 زیرغورلانے کی تحریک پیش کی گئی جسے کثرت رائے سے منظور کرلیا گیا ہے۔

تحریک کی حمایت میں 221 ووٹ پڑے جبکہ مخالفت میں 203 ووٹ پڑے، حکومت نے اپوزیشن کو 18 ووٹوں سے شکست دے دی۔

اپوزیشن کے دس جبکہ حکومت کے پانچ ارکان مشترکہ اجلاس میں موجود نہیں تھے۔

پیپلزپارٹی کے سکندر میندھرو، نویدقمر، یوسف تالپورغیر حاضر ہیں جبکہ علی وزیر، اخترمینگل بھی ایوان کی کارروائی میں شریک نہیں ہوئے۔

اپوزیشن نے ترمیم پر گنتی کو چیلنج کیا،  پیپلز پارٹی رکن تاج حیدر نے اعتراض اٹھایا کہ پہلے گنتی کو درست کریں۔

اسپیکر نے ترمیم پر دوبارہ گنتی کرنے کی ہدایت کی۔

اس کے ساتھ ساتھ کلبھوشن یادیو کوعالمی عدالت انصاف نظرثانی غور مکرر بل 2021ء بھی پارلیمنٹ کے مشترکہ اجلاس میں منظور کر لیا گیا۔

الیکشن ایکٹ دوسرا ترمیمی بل بھی منظوری کے لیے مشیر برائے پارلیمانی امور بابر اعوان نے ایوان میں پیش کیا۔

پارلیمنٹ نے حکومت کا انتخابی ترمیمی بل 2021 منظور کرلیا۔

بھارتی جاسوس کلبھوشن یادیو کو عالمی عدالت انصاف نظرثانی غور مکرر بل 2021 بھی پارلیمنٹ کے مشترکہ اجلاس میں منظور کر لیا گیا۔

حکومتی بل منظور ہونے پر ایوان میں “کون بچائے گا پاکستان عمران خان عمران خان ” کے نعرے لگائے گئے جبکہ اپوزیشن کی جانب سے ایوان میں ڈویژن کروانے کا مطالبہ کیا گیا۔

دوسری جانب حکومتی بل پاس ہونے پر وزیراعظم عمران خان سمیت حکومتی ارکان پارلیمنٹ نے ڈیسک بجا کر خوشی کا اظہار کیا جبکہ حکومتی بل منظور ہونے پر اپوزیشن نے ایوان سے واک آؤٹ کر دیا۔