متحدہ عرب امارات (یو اے ای) پاکستان سے دفاعی آلات خریدے گا۔

تفصیلات کے مطابق پاکستانی کمپنی گلوبل انڈسٹریل اینڈ ڈیفنس سلیوشن کے ساتھ مختلف ہتھیاروں کی خریداری کے لئے معاہدہ طے پا گیا ہے، یو اے ای پاکستان سے 7 ارب روپے سے زیادہ کے دفاعی آلات خریدے گا۔

پاکستان کے دفاعی آلات کو اپنے معیار، تکنیک اور ڈیفنس کے لحاظ سے دنیا کے بڑے ملکوں میں بنائے جانے والے آلات کے مقابل رکھا جا سکتا ہے، دبئی ایئر شو میں پاکستان کے دفاعی آلات دوسرے ملکوں کے لئے خصوصی توجہ کا باعث بنتے ہیں۔

دبئی ایئر شو میں 2019ء کے ایڈیشن میں ہونے والے سودوں کی مجموعی مالیت تقریباً 18ارب درہم تھی جو کہ دبئی ایئر شو 2021ء ایڈیشن کے صرف تیسرے روز ہی بڑھ کر 20ارب درہم تک پہنچ گئی اس سے یہ اندازہ لگانا مشکل نہیں کہ پاکستان کو دبئی ایئر شو پر سالانہ رپورٹ میں اپنی موجودگی کو برقرار رکھنا چاہیے تاکہ دفاعی آ لات کے مزید سودوں کے لئے مزید نئی منڈیوں کے مواقع تلاش کر کے زرمبادلہ میں اضافہ کیا جا سکے۔

واضح رہے کہ دبئی ایئر شو دفاعی آلات کی سودا کاری کے حوالے سے ایک بڑی منڈی ہے اور پاکستان کی جانب سے 7 ارب روپے سے زائد مالیت کے معاہدوں کا حصول ایک اہم کامیابی ہے۔