بنگلہ دیش میں دو ٹرینوں کے تصادم سے 16افراد ہلاک اوردرجنوں زخمی ہوگئے ہیں۔

مقامی میڈیا کے مطابق حادثہ  ضلع برہامنبریا میں پیش آیا ۔ ایک ٹرین چٹاگانگ اور دوسری ڈھاکہ جارہی تھی۔ افسوسناک واقعہ کی اطلاع ملتے ہیں امدادی ٹیمیں جائے وقوع پر پہنچ چکی ہیں اور زخمیوں کو  قریبی  اسپتال منتقل کیا جا رہا ہے۔امدادی کارروائیوں میں شریک کارکنوں کے مطابق حادثے سے ہلاکتوں میں اضافے کا خدشہ ہے۔

ضلعی آفیسر کے امدادی کارروائیوں میں پولیس، فوج اور فائربریگیڈ کے محکمے حصہ لے رہے ہیں۔ ان کے مطابق حادثہ صبح کے وقت پیش آیا جب اکثر مسافر سو رہے تھے جس کے سبب ہلاکتوں میں اضافے کا خدشہ ہے۔ فی الحال اس بات کا علم نہیں ہوسکا کہ کس طرح دونوں ٹرینیں ایک پٹڑی پر آگئیں تاہم حکومت نے تحقیقات کا حکم دے دیا ہے۔ریلوے حکام کے مطابق ایسا حادثہ صرف اس صورت میں ممکن ہے جب ایک ٹرین کے ڈرائیور نے  سگنل  توڑا ہو تاہم اس واقعہ کی وجوہات سامنے آنا ابھی باقی ہیں۔

وزیر اعظم شیخ حسینہ نے زخمیوں اور قیمتی  جانوں کے ضیاع پر  گہرے دکھ  اور افسوس کا اظہار کیا ، انہوں نے عہدیداروں اور عوام سے متاثرین کی امداد فراہم کرنے کی اپیل کی۔

خیال رہے کہ بنگلہ دیش میں عملے کی غلفت اور خستہ حال پٹری کے سبب اکثر و بیشتر ٹرین کے حادثات پیش آتے رہتے ہیں۔