مسلم لیگ (ن) کی رہنما عظمیٰ بخاری کا کہنا ہے کہ نوازشریف سے زیادہ کسی حکمران نے اداروں کو مضبوط نہیں کیا۔

مسلم لیگ (ن) پنجاب کی ترجمان عظمیٰ بخاری نے وزیراعلیٰ پنجاب عثمان بزدار کے بیان پر ردعمل دیتے ہوئے کہا کہ بزدارصاحب آپ کا فہم فراست اور سوچنے سمجھنے سے کوئی تعلق نہیں بلکہ آپ کا تعلق صرف کھانے اور کھلانے سے ہے جو آپ خوش اسلوبی سے سرانجام دے رہے ہیں۔

عظمیٰ بخاری کا کہنا تھا کہ بزدار صاحب آپ نے اداروں کا نام فرنٹ مین، شوگر مافیا اور پیٹرول مافیا رکھا ہے، ان سب مافیا کا سرغنہ صرف عمران نیازی ہے، عمران نیازی اداروں کی بدنامی کا باعث بھی بن رہے ہیں اور وہ اداروں کے پیچھے چھپ رہے ہیں جب کہ اداروں پر تنقید ہم نہیں عمرانی ٹولہ دھڑلے سے کرتا ہے۔

ترجمان مسلم لیگ (ن) پنجاب نے کہا کہ نوازشریف سے زیادہ کسی حکمران نے اداروں کو مضبوط نہیں کیا، نوازشریف نے فوج کو ایٹم بم، جے ایف تھنڈر طیارے اور رن وے کے لئے موٹرویز دیں، نوازشریف کی قیادت میں عدلیہ بحالی کی تحریک چلی اور بحال بھی ہوئی۔

عظمیٰ بخاری کا مزید کہنا تھا کہ پاکستان کے تمام ادارے ملک و قوم کی ملکیت ہیں کسی فرد واحد کی جاگیر نہیں ہیں، عمران خان اور ثاقب نثار جیسے مہروں کو اداروں کا نام مت دیں۔

واضح رہے وزیراعلیٰ پنجاب عثمان بزدار نے اپنے بیان میں کہا تھا کہ اداروں کے خلاف بیان بازی کرنے والے ملک کے خیر خواہ نہیں ہیں۔