پاک چین چیمبر آف کامرس اینڈ انڈسٹری کے صدر مسٹر وانگ ذہائی نے کہا ہے کہ پاکستان جیم اسٹون کے ذخائر کے حوالے سے دنیا کا پانچواں سب سے بڑا ملک ہے۔

پاک چین چیمبر کی ایکسپورٹ کمیٹی کا آن لائن اجلاس ہوا جس میں چیمبر کے سینئر نائب صدر احسن شیخ، نائب صدر سرفراز بٹ اور سیکرٹری جنرل صلاح الدین حنیف کے علاوہ متعدد اراکین عاملہ نے شرکت کی۔

اس موقع پر پاک چین چیمبر آف کامرس اینڈ انڈسٹری کے صدر مسٹر وانگ ذہائی نے اظہارِ خیال کرتے ہوئے کہا کہ چین جیم اینڈ جیولری کا سب سے بڑا صارف ملک ہے اور اس شعبے میں دونوں ملکوں کے اشتراک عمل سے پاکستان کی برآمدات میں خطیر اضافہ کیا جا سکتا ہے۔

ان کا کہنا تھا کہ وہ اس سلسلے میں چینی درآمد کنندگان کا ایسا نیٹ ورک تشکیل دے رہے ہیں جو پاکستان میں جیم اینڈ جیولری کے شعبہ میں پاکستانی تاجروں اور صنعتکاروں کے ساتھ اشتراک عمل کریں گے۔

وانگ زہائی نے کہا کہ پاکستان میں 8 لاکھ قراط روبی، 87 ہزار قیراط ایمرلڈ اور 50 لاکھ کے لگ بھگ دیگر موتیوں کو برآمد کرنے کی گنجائش موجود ہے لیکن افسوس کہ کٹنگ اور ڈیزائینگ کی جدید سہولتوں کے فقدان کی وجہ سے ان زخائر سے استفادہ ممکن نہیں۔

انہوں نے کہا کہ چین سے اشتراک عمل سے اس شعبے میں موجود ٹیکنالوجی کہ یہ فقدان بھی پورا ہو جائے گا۔

پاک چین چیمبر کے سینئر نائب صدر احسن شیخ نے خطاب کرتے ہوئے کہا کہ جیم اینڈ جیولری کے شعبے میں این پی او اور اے پی او کے تحت چینی ماہرین کے توسط سے تربیتی پروگرام بھی منعقد کروائے جانے چاہیں۔

انہوں نے کہا کہ اس سلسلے میں وہ چینی ماہرین سمیت اپنے چیمبر کے تحت تمام متعلقہ اداروں کو یکجا کرنے کی کوشش کریں گے۔

پاک چین چیمبر کے نائب صدر سرفراز بٹ نے اس امر پر اتفاق کیا کہ جیم اینڈ جیولری کے شعبے کو ترقی دے کر پاکستان کی برآمدات میں کثیر اضافہ کیا جا سکتا ہے۔

انہوں نے بتایا کہ 1980 تک چین کے صرف 20 ہزار افراد جیم اینڈ جیولری کے شعبے سے وابستہ تھے، مگر 30 سال بعد اب چین میں 30 لاکھ افراد جیم اینڈ جیولری کے شعبہ سے وابستہ ہیں اور اب چین میں لیبر کے اخراجات میں اضافے کی وجہ سے چین کے جیم اینڈ جیولری سیکٹر میں پاکستانی لبیر کیلئے بھی وسیع گنجائش پیدا ہو گئی ہے۔

پاک چین چیمبر کے سیکرٹری جنرل صلاح الدین حنیف نے اپنے خطاب میں کہا کہ جیم اینڈ جیولری کے شعبہ میں جدت پیدا کر کے پاکستان چینی منڈی میں واضح مقام حاصل کر سکتا ہے۔

انہوں نے کہا پاک چین چیمبر کے صدر وانگ ذہائی کی کوششوں سے پاکستان سے چین کو بھجوائی جانے والی برآمدات میں مسلسل اضافہ ہو رہا ہے اور اس سلسلے میں جیم اینڈ جیولری کے شعبے میں بھی پاک چین اشتراک عمل کے ثمرات جلد نظر آنے لگیں گے۔