عبدالقیوم نیازی نے کہا ہے کہ نائیک رحمان اور لانس نائیک عارف شہید  کو خراج عقیدت پیش کرتے ہیں۔

وزیراعظم آزاد جموں و کشمیر سردار عبدالقیوم نیازی نے شمالی وزیرستان میں دہشت گردی کے حملے کی شدید مذمت کرتے ہوئے کہا ہے کہ قوم وطن عزیز سے دہشت گردی کے خاتمے کیلئے اپنی پاک فوج کے شانہ بشانہ کھڑی ہے۔

انہوں نے کہا کہ پاک فوج نے دہشت گردی کے خلاف عظیم قربانیاں دی ہیں ، نائیک رحمان اور لانس نائیک عارف شہید  کو خراج عقیدت پیش کرتے ہیں۔

دوسری جانب وزیراعلیٰ خیبر پختونخوا محمود خان نے شمالی وزیرستان میں  سیکورٹی فورسز کی چوکی پر دہشتگردوں کے حملے کی مذمت کرتے ہوئے کہا کہ دہشتگردی کے خلاف جنگ میں پوری قوم سیکورٹی فورسز کے ساتھ ہے۔

محمود خان نے واقعے میں دو  سیکورٹی اہلکاروں کی شہادت پر اظہار تعزیت اور شہداء کے اہل خانہ سے دلی ہمدردی کا اظہار کیا۔

انہوں نے شہداء کے درجات کی بلندی اور پسماندگان کے لئے صبر جمیل کی دعا کی اور کہا کہ دہشتگردی کے خلاف جنگ میں سیکورٹی فورسز نے لازوال قربانیاں دی ہیں۔

واضح رہے کہ دہشت گردوں نے دتہ خیل میں فوجی چیک پوسٹ پر حملہ کیا جس کے باعث 2 سپاہی شہید ہو گئے۔

پاک فوج کے شعبہ تعلقات عامہ ( آئی ایس پی آر ) کے مطابق دہشت گردوں نے فوجی چیک پوسٹ کو نشانہ بنایا ، فائرنگ کے شدید تبادلے میں دو سپاہی شہید ہو گئے۔

آئی ایس پی آر کا کہنا تھا کہ شہداء میں 27 سالہ نائیک رحمان اور 22 سالہ لانس نائیک عارف شامل ہیں جبکہ علاقے میں دہشت گردوں کی تلاش کے لیے سرچ آپریشن جاری ہے۔