مولانا فضل الرحمن نے آزادی مارچ کو ملک گیر دھرنوں میں تبدیل کرنے کا فیصلہ کرلیا ہے۔

تفصیلات کے مطابق پشاور موڑ پر14 دن سے بیٹھے شرکاء  پشاور موٹر وے چوک منتقل ہوجائیں گے جبکہ کل چاروں صوبوں کی قومی شاہراہیں بلاک کی جائیں گی۔

جمعیت علمائے اسلام ف کے رہنما مولانافضل الرحمٰن نے اسلام آباد میں موجودآزادی مارچ کے تمام کارکنوں کو فوری طور پر پنڈال میں جمع ہونے کی تاکید کر دی ہے۔

تفصیلات کے مطابق سینیٹرمولانا عطا الرحمٰن کا کہنا ہے کہ جے یو آئی ف کے سربراہ مولانا فضل الرحمان جلد اہم اعلان کرنے آ رہے ہیں، اس لیے کارکنان تمام کام چھوڑ کر پنڈال میں جمع ہو جا ئیں۔

ذرائع کے مطابق آزادی مارچ احتجاج کے پلان بی پر بلوچستان میں عملدرآمد شروع کر دیا گیا ہے،پلان بی کے تحت جمعیت علمائے اسلام ف کے کارکنوں کی جانب سے کوئٹہ چمن شاہراہ پر دھرنا جاری ہے، کارکنوں نے رکاوٹیں کھڑی کر کے کوئٹہ چمن شاہراہ ٹریفک کی آمدورفت کے لیے بند کر دی ہے۔

چمن کوئٹہ شاہراہ کو کھولنے کے لیے انتظامیہ اور مظاہرین کے درمیان مذاکرات بھی ہوئے جو ناکام ہو گئے۔

مظاہرین کا کہنا ہے کہ چمن ہڑتال مولانا فضل الرحمٰن کے حکم پر ختم کی جائے گی۔

جے یو آئی ف کے صوبائی امیر مولانا عبدالواسع کا اس حوالے سے کہنا ہے کہ بلوچستان میں آزادی مارچ احتجاج کے پلان بی پر عملدرآمد شروع کیا گیا ہے۔