فلسطین کے مغربی کنارے واقع قصبے ہیبرون میں اسرائیلی قابضین نے فلسطینی کسانوں پر حملہ کرکے ان کی پالتو بھیڑوں کو کھول دیا تاکہ وہ فصلوں کو نقصان پہنچا سکیں۔

فلسطینی خبر ایجنسی وفا کے مطابق اسرائیلی فوجیوں کی پُشت پناہی میں قابضین کے درجنوں جتھوں نے جنوبی ہیبرون کی پہاڑیوں میں واقع قصبے طوبیٰ میں فلسطینی کسانوں کی زمینوں پر ہلا بول دیا۔ جب کسانوں نے اپنی فصلوں کو بچانے کیلیے بھیڑوں کو روکنے کی کوشش کی تو قابضین نے ان سے جھگڑا اور مار پیٹ کی۔

ہیبرون قصبہ فلسطینیوں کیلیے یرغمالی علاقے کی حیثیت رکھتا ہے جہاں موجود اسرائیلی قابضین آئے دن اُنہیں کسی نہ کسی طرح پریشان کرتے رہتے ہیں۔ یہاں فلسطینیوں کو ہراساں کرنا اسرائیلی قابضین اور فوجیوں کا معمول ہے۔

اسرائیلی قابضین غیرقانونی گھروں کی تعمیر کیلیے فلسطینیوں کے گھروں اور زمینوں پر قبضے کرتے ہیں اور زیتون کے درختوں کو اُکھاڑ دیتے ہیں۔

انسانی حقوق کی تنظیموں کے مطابق 1967 سے مغربی کنارے پر قابض اسرائیلی نہتے فلسطینی شہریوں کے خلاف مختلف جرائم کا ارتکاب کرتے آئے ہیں۔

مقبوضہ مغربی کنارے اور مشرقی یروشلم میں 6 لاکھ سے زائد یہودی اسرائیلی آباد ہیں جو بین الاقوامی قوانین کے مطابق وہاں غیرقانونی طور پر مُقیم ہیں۔

اقوام متحدہ کے ذیلی ادارے دی آفس آف کوآرڈینیشن آف ہیومینیٹیرین افیئرز (اوچھا) کے مطابق 2021 کے پہلے تین ماہ میں اسرائیلی قبضوں کے 210 واقعات رپورٹ ہوئے جن میں ایک فلسطینی کی شہادت کا واقعہ بھی شامل ہے۔ اوچھا نے اسرائیل پر ایسے واقعات کی تفتیش اور انہیں روکنے کے لیے قانونی اقدامات کرنے پر زور بھی دیا مگر عالمی طاقتوں کا حمایت یافتہ اسرائیل کسی بات کو خاطر میں نہیں لاتا۔