کراچی: نیشنل اسٹیڈیم میں ثقلین مشتاق نے بابر اعظم کو ایک اوور کا چیلنج دے دیا جس میں بابر اعظم کو شکست ہوگئی ہے۔

دنیائے کرکٹ کے نمبر ون بیٹسمین اور قومی ٹیم کے کپتان بابر اعظم ثقلین مشتاق کا دیا ہوا چیلنج پورا نہیں کرسکے، ثقلین مشتاق نے اپنا مشہور ’دوسرا‘ کراکے بابر اعظم کو آؤٹ کردیا۔

سماجی رابطے کی مائیکرو بلاگنگ ویب سائٹ ٹوئٹر پر پی سی بی کی جانب سے ایک ویڈیو شیئر کی گئی ہے جس میں قومی ٹیم کے نگراں ہیڈ کوچ ثقلین مشتاق بابر اعظم کو ایک اوور میں 12 رنز بنانے کا چیلنج دے رہے ہیں۔

Will Babar Azam be able to beat the challenge? Witness the chase, as Babar Azam and Saqlain Mushtaq come face to face in National Stadium Karachi.#HumTouKhelainGey #PAKvWI pic.twitter.com/Sy51DPRGdR

Advertisement

— Pakistan Cricket (@TheRealPCB) December 15, 2021

ویڈیو میں دیکھا جاسکتا ہے کہ بابر اعظم نے ثقلین کے چیلنج کو قبول کیا اور بلا لے کر کریز پر پہنچ گئے، پہلی گیند پر بابر اعظم نے ایک رن لیا اور دوسری ہی بال پر زوردار شاٹ دے مارا لیکن درمیان میں موجود فیصلہ کرنے والے امپائر نے دو رنز کا اشارہ دیا۔

یہ بھی پڑھیں: بابر اعظم کی بیٹنگ اور بولنگ کے بعد وکٹ کیپر بننے کی تیاری

ویڈیو میں دیکھا جاسکتا ہے کہ اگلی ہی بال پر ماہناز آف اسپنر ثقلین مشتاق نے اپنا مشہور ’دوسرا‘ یعنی گھومتی ہوئی آہستہ گیند کروادی جس پر بابر اعظم بھی چکرا گئے اور آگے نکل کر کھیلنے کے چکر میں بال کو مس کر بیٹھے۔

بال مس کرنے پر درمیان میں موجود فیصلہ کرنے والے امپائر نے آؤٹ کا اشارہ کیا جس پر ثقلین نے خوب جشن منایا، بعد ازاں بابر اعظم نے نگراں ہیڈ کوچ کو لیجنڈ قرار دیا۔

واضح رہے کہ سابق آف اسپنر ثقلین مشتاق 10 سال تک پاکستان ٹیم کی نمائندگی کرچکے ہیں جبکہ انہوں نے اپنے کیریئر میں 49 ٹیسٹ میچز اور 169 ون ڈے میچز کھیلے ہیں جس میں انہوں نے 496 وکٹیں حاصل کی ہیں۔