سیالکوٹ میں اسپورٹس گارمنٹ کی فیکٹری کے غیر مسلم سری لنکن منیجر پریانتھا کمارا کو جلانے کے مقدمے میں بڑی پیش رفت سامنے آئی ہے۔

ذرائع کے مطابق پراسیکیوشن نے سری لنکا کے شہری کو بچانے والے ملک عدنان کو گواہ بنانے کا فیصلہ کیا ہے۔

اس حوالے سے پراسیکیوشن کی خصوصی ٹیم نے تفتیشی افسر کو ہدایات جاری کردی۔

پراسیکیوشن کا کہنا ہےکہ سانحہ سیالکوٹ کے کیس میں ملک عدنان کو گواہوں کی فہرست میں شامل کیا جائے ۔

انہوں نے بتایاکہ مقدمے کا چالان جنوری کے پہلے ہفتے پراسیکیوشن میں جمع کروایا جائے گا، چالان میں ویڈیوز شوائد اہم دستاویزات ہونگی تمام ویڈیوز کو بطور شہادت عدالت پیش کیا جائے گا۔

ذرائع کے مطابق پراسیکیوشن نے مقدمے کا ٹرائل جنوری میں شروع کرنے کا فیصلہ کیا ہے۔

سانحہ سیالکوٹ: اب تک کتنے ملزمان گرفتار ہوچکے؟

صوبائی وزیر قانون پنجاب راجہ بشارت کا کہنا ہے کہ سانحہ سیالکوٹ میں اب تک 182 افراد کو گرفتار کیا جا چکا ہے۔

پنجاب اسمبلی میں صوبائی وزیر قانون راجہ بشارت نے سانحہ سیالکوٹ کے حوالے سے سوالات کے جوابات دیتے ہوئے بتایا کہ اب تک واقعے میں ملوث 182 افراد کو حراست میں لیا گیا اور عدم ثبوت پر 62 افراد کو رہا کر دیا گیا ۔

متعلقہ خبر: محکمہ پراسیکیوشن سیالکوٹ واقعے کی سماعت کے دوران مانیٹرنگ کرے

120 افراد شامل تفتیش ہیں جبکہ 52 کی باضابطہ گرفتاری کی گئی ہے اور یہ تمام 52 ملزمان جسمانی ریمانڈ پر ہیں اور کوئی بھی شخص ضمانت پر رہا نہیں ہوا، پراسیکیوشن کی خصوصی ٹیم پولیس کی مدد اور سماعت کی نگرانی کررہی ہے ۔

انہوں نے بتایاکہ 30 روز کے اندر چالان عدالت میں پیش کر دیں گے، ہم سب کو اس معاملات پر سنجیدگی سے تجاویز دینا ہوں گی۔