سندھ کے بعد پنجاب میں بھی آوارہ کتوں کے قاتلانہ وار بڑھنے لگے، ایک ہی دن میں کتے کے کاٹنے سے ایک بچہ جاں بحق جبکہ پانچ افراد زخمی ہوگئے۔

تفصیلات کے مطابق سندھ کے بعد اب فیروزوالہ میں بھی ایک ہی دن میں کتے کے کاٹنے سے دس سالہ بچہ دوران علاج جاں بحق ہوگیا جبکہ سگ گزیدگی کے مختلف واقعات میں پانچ افراد زخمی بھی ہوگئے۔

ذرائع کا کہنا تھا کہ شیخوپورہ میں جاں بحق ہونے والے بچے کی شناخت علی احمد کے نام سے ہوئی، ضلع انتظامیہ کی غفلت اور لاپرواہی کی وجہ سے کتے کے کاٹنے سے والدین کا اکلوتا بیٹا جاں بحق ہوا۔

ذرائع کا مزید کہنا تھا کہ اسسٹنٹ کمشنر فیروزوالہ کو بار بار درخواستیں دینے پر بھی انتطامیہ آوارہ کتوں پر قابو نہ پاسکی ۔

واضح رہے اس سے قبل کراچی میں بھی شہری آوارہ کتوں کا شکار بن گئے تھے، کتے کے کاٹنے کی بیماری ریبیز سےایک 45 سالہ شخص سلیم چل بسا۔

نیو کراچی کا رہائشی، 6 بچوں کا باپ، محمد سلیم جو چند روز قبل اپنی چار سالہ بیٹی کو پا گل کتے سے بچاتے ہوئے ریبیزجیسی لاعلاج بیماری کا شکار ہو گیا تھا، جناح اسپتال کے انتہائی نگہداشت کے وارڈ میں دم تو ڑ گیا تھا۔

ذرائع کے مطا بق متا ثرہ محمد سلیم کو پہلے سندھ گورنمنٹ ہسپتال نیو کراچی لے جا یا گیا جہاں اینٹی ریبیز ویکسین نہ ملی پھرعباسی شہید ہسپتال لے جایا گیا مگر وہا ں بھی ویکسین نہ تھی۔

پھرعباسی شہید ہسپتال انتظامیہ نے باہر سے منگوا کر آدھی خوراک دی، حالت بگڑی تو جناح ہسپتال لے جایا گیا جہاں 45 سالہ محمد سلیم حالت بگڑنے کے با عث رات گئے دم توڑ گیا تھا۔

جناح اسپتال کی ایگزیکٹو ڈائریکٹر ڈاکٹر سیمی جمالی کا کہنا ہے کہ اگر اس مریض کو بروقت اینٹی ریبیز ویکسین لگا دی جاتی تو اسے یہ مہلک مرض لاحق نہیں ہوسکتا تھا۔